ନାକଟିଦେଉଳ (ବଡ଼ ଖବର ବ୍ୟୁରୋ): ସରକାର ଗରିବଙ୍କ ପାଇଁ ମାଳମାଳ ଯୋଜନା କରୁଛନ୍ତି । ହେଲେ ସେ ସବୁ ସଠିକ ଲୋକଙ୍କ ପାଖରେ ପହଞ୍ଚି ପାରୁନି । ସ୍ୱାଧିନତାର ଦୀର୍ଘ ୭ ଦଶନ୍ଧି ପରେ ମଧ୍ୟ ଲୋକେ ନିଜର ମୌଳିକ ସୁବିଧା ପାଇବାରୁ ବଞ୍ଚିତ ହେଉଛନ୍ତି । ସରକାରଙ୍କ ଆବାସ ଯୋଜନାରୁ ବଞ୍ଚିତ ହୋଇ ଝାଟିମାଟି ଘରେ ତାଳ ବରଡା ଛପର କରି ଦୟନୀୟ ଜୀବନ ବିତାଉଛନ୍ତି । ଏମାନଙ୍କର ଅବସ୍ଥା ଦେଖିଲେ ସରକାରୀ ଯୋଜନାର ବାସ୍ତବତା ଉପରେ ପ୍ରଶ୍ନବାଚୀ ସୃଷ୍ଟି ହୁଏ । ସରକାରୀ ଯୋଜନାର ଏପରି ଏକ ବାସ୍ତବ ଚିତ୍ର ଦେଖିବାକୁ ମିଳିଛି ସମ୍ବଲପୁର ଜିଲ୍ଲା ନାକଟିଦେଉଳ ବ୍ଲକରେ । ଘୋଷରାମାଳ ପଞ୍ଚାୟତ କୁଡାନାଳୀ ଶଙ୍ଖପୁର ଗ୍ରାମ ମଲ୍ଲାର ସାହିରେ ପ୍ରାୟ ୭୦ ବର୍ଷ ହେଲା ୨୦ଟି ପରିବାର ରହୁଛନ୍ତି ।
୧୦୦ରୁ ଅଧିକ ଲୋକ ବସବାସ କରୁଛନ୍ତି । ହେଲେ ସାହିରେ ଥିବା ନଳକୂପଟି ଲୋକଙ୍କ ଶୋଷ ମେଣ୍ଟାଇ ପାରୁ ନାହିଁ । ତେଣୁ ସାହି ଲୋକେ ବାଧ୍ୟ ହୋଇ ନିକଟସ୍ଥ ନାଳରୁ ଚୂଆ ଖୋଳି ପିଇବା ପାଣି ସଂଗ୍ରହ କରୁଛନ୍ତି । ସେହିପରି ସାହିକୁ ପକ୍କା ସଡକ ଟିଏ ମଧ୍ୟ ନାହିଁ । ଆବାସ ଯୋଜନାରୁ ମଧ୍ୟ ବହୁ ଲୋକ ବଞ୍ଚିତ ହୋଇଛନ୍ତି । ସମସ୍ତଙ୍କୁ ପକ୍କା ଘର ଯୋଗାଇ ଦେବାକୁ ସରକାର ମାଳମାଳ ଯୋଜନା କରିଥିଲେ ସୁଦ୍ଧା ଏହାର ଫଳ ଶୂନ । କେବଳ ସାମାଜିକ ସୁରକ୍ଷା ଯୋଜନାରେ ଭତ୍ତା ଏବଂ ଖାଦ୍ୟ ସୁରକ୍ଷା ଯୋଜନାରେ ଚାଉଳ ଛଡା ଆଉ କିଛି ଯୋଜନା ଏମାନଙ୍କ ପାଖରେ ପହଞ୍ଚି ପାରି ନାହିଁ ।
ନିର୍ବାଚନ ପରେ ନିର୍ବାଚନ ହେଉଛି । ନେତା ଠାରୁ କର୍ମୀ ସମସ୍ତେ ଆସି ପ୍ରତିଶ୍ରୁତି ଦେଇ ଭୋଟ ହାତେଇ ନେଉଛନ୍ତି । ଭୋଟ ସରିଲା ପରେ ସବୁ ଭୁଲି ଯାଉଛନ୍ତି ବୋଲି ଏଠାକାର ଲୋକେ କହିଛନ୍ତି । ସରକାର ସେମାନଙ୍କ ସମସ୍ୟା ପ୍ରତି ଦ୍ରୁଷ୍ଟି ଦେଇ ଶୀଘ୍ର ବିଶୁଦ୍ଧ ପାଣିର ବ୍ୟବସ୍ଥା କରିବା ସହ ଆବାସ ଯୋଜନାରେ ଘର ଯୋଗାଇ ଦେବାକୁ ଦାବି କରିଛନ୍ତି ସାହିର ଲୋକେ ।
