ବର୍ଷେ ହେଲା ପଡ଼ିରହିଛି ମୃତ ଦେହ

(ବଡ଼ ଖବର ବ୍ୟୁରୋ): ବର୍ଷେ ହେଲା ପଡ଼ି ରହିଛି କୋଭିଡରେ ପ୍ରାଣ ହରାଇଥିବା ବ୍ୟକ୍ତଙ୍କ ମୃତ ଦେହ । ଏପରି ଅଭାବନୀୟ ଘଟଣା ଘଟିଛି ବିଶ୍ୱର ସବୁଠାରୁ ଶକ୍ତିଶାଳୀ ରାଷ୍ଟ୍ର ଆମେରିକାରେ । କରୋନାର ପ୍ରଥମ ଲହରରେ ବହୁମାତ୍ରାରେ ପ୍ରଭାବିତ ହୋଇଥିଲା । ପ୍ରାଣ ହରାଇଥିଲେ ହଜାର ହଜାର ରୋଗୀ । ଆଉ ରୋଗୀଙ୍କ ମୃତ ଦେହକୁ ରଖିବା ପାଇଁ ହସ୍ପିଟାଲ ପରିସରରେ ଯାଗା ମଧ୍ୟ ମିଳୁନଥିଲା । ଏହାକୁ ଦୃଷ୍ଟିରେ ରଖି ପ୍ରଶାସନ ଶବକୁ ଦୀର୍ଘଦିନ ପାଇଁ ସାଇତି ରଖିବାକୁ ଅସ୍ଥାୟୀ ବ୍ୟବସ୍ଥା କରିଥିଲା ।

ରେଫ୍ରିଜରେଟର ସୁବିଧା ଥିବା ଟ୍ରକରେ ଶବ ଗୁଡ଼ିକୁ ରଖାଯାଇଥିଲା । ତେବେ ଏହା ମଧ୍ୟରେ ବର୍ଷେ ବିତିଯାଇଥିଲେ ମଧ୍ୟ ଶବଗୁଡ଼ିକ ପଡ଼ିରହିଛି । ପାଖାପାଖି ୭୫୦ ଶବ ଏପର୍ଯ୍ୟନ୍ତ ପଡ଼ି ରହିଛି । ଏନେଇ ନ୍ୟୁୟର୍କ ନଗର ପରିଷଦ ସ୍ୱାସ୍ଥ୍ୟ କମିଟି ସୂଚନା ଦେଇଛି । ତେବେ ମୃତ ଦେହ ଗୁ୍ଡ଼ିକୁ ଆମେରିକାର ହାର୍ଟ ଦ୍ୱିପରେ କବର ଦେବାକୁ ପ୍ରଶାସନ ଯୋଜନା କରିଛି । ମୃତ କୋଭିଡ଼ ରୋଗୀଙ୍କ ପରିବାର ସହ ଯୋଗାଯୋଗ କରାଯାଉଛି । ଅନୁମତି ମିଳିଲେ ସବୁ ମୃତ ଦେହକୁ କବର ଦିଆଯିବ ।