ସୁବାଷ ଗନ୍ତାୟତଙ୍କ ଦେହାନ୍ତ

ଭୁବନେଶ୍ୱର(ବଡ଼ ଖବର ବ୍ୟୁରୋ):ବରିଷ୍ଠ ବିଜେପି ନେତା ସୁବାଷ ଗନ୍ତାୟତଙ୍କ ପରଲୋକ । ଦୀର୍ଘଦିନ ଧରି କ୍ୟାନସର ରୋଗରେ ପୀଡ଼ିତ ଥିଲେ ସୁବାଷ । ମୃତ୍ୟୁ ବେଳକୁ ତାଙ୍କୁ ୬୫ବର୍ଷ ବୟସ ହୋଇଥିଲା । ଆଜି ସକାଳ ୬ଟା ୧୫ରେ ମୁମ୍ବାଇର ଏକ ଘରୋଇ ହସ୍ପିଟାଲରେ ଆଖି ବୁଜିଛନ୍ତି ସୁବାଷ ଗନ୍ତାୟତ । ବିଜେପିର ରାଜ୍ୟ କାର୍ଯ୍ୟକାରିଣୀ ସଦସ୍ୟ ଥିଲେ ସେ । ପ୍ରବାସୀ ଓଡ଼ିଆ ସମାଜର ମଧ୍ୟ ଆବାହକ ଭାବେ କାର୍ଯ୍ୟ କରୁଥିଲେ ।

ସୁବାଷଙ୍କ ଘର ଖୋର୍ଦ୍ଧା । ସେ ଛାତ୍ର ଜୀବନରୁ ବିଭିନ୍ନ ଆନ୍ଦୋଳନରେ ନିଜକୁ ସାମିଲ କରିଥିଲେ । ଖୋର୍ଦ୍ଧା ପିଏନ କଲେଜର ପୂର୍ବତନ ସଭାପତି ଥିଲେ । ଅଖିଳ ଭାରତୀୟ ବିଦ୍ୟାର୍ଥୀ ପରିଷଦର ପୂର୍ବତନ ରାଜ୍ୟ ସମ୍ପାଦକ ମଧ୍ୟ ଥିଲେ ସେ । ଜରୁରୀକାଳୀନ ପରିସ୍ଥିତି ବେଳେ ଏବିଭିପିର ନେତୃତ୍ୱ ନେଇ ଜେଲ ମଧ୍ୟ ଯାଇଥିଲେ ସୁବାଷ । ରାଜ୍ୟ ବିଶେଷ କରି ଖୋର୍ଦ୍ଧା ଜିଲ୍ଲା ରାଜନୀତିରେ ମଧ୍ୟ ବେଶ୍ ସକ୍ରିୟ ଥିଲେ ସୁବାଷ ଗନ୍ତାୟତ ।