ନୂଆଦିଲ୍ଲୀ(ବଡ଼ କବର ବ୍ୟୁରୋ): ଦିନକୁ ଦିନ ବଢ଼ୁଛି କଂଗ୍ରେସର ଦଳୀୟ କନ୍ଦଳ । ରାଜସ୍ଥାନରେ ଅଶୋକ ଗେହଲଟ ଓ ସଚିନ ପାଇଲଟଙ୍କ ମଧ୍ୟରେ ଏବେ ବିବାଦ ବଢ଼ିବାକୁ ଲାଗିଛି । ଏ ଦୁହିଁଙ୍କ କଳି ମଧ୍ୟରେ ଦଳ ନା ଅଶୋକ ଗେହଲଟଙ୍କ ଭଳି ବରିଷ୍ଠ ନେତାଙ୍କୁ ହରାଇବାକୁ ଚାହୁଁଛି, ନା ସଚିନ ପାଇଲଟଙ୍କ ଭଳି ଯୁବନେତାଙ୍କୁ ଦଳରୁ ଛାଡ଼ିବାକୁ ଚାହୁଁଛି । କାରଣ ଅଶୋକ ଦଳର ବର୍ତ୍ତମାନ ହେଲେ ସଚିନ ଦଳର ଭବିଷ୍ୟତ । ଏପରି ଛକାପଞ୍ଝା ମଧ୍ୟରେ ସଚିନ ପାଇଲଟ ଦିଲ୍ଲୀ ଯାଇଥିଲେ । ହେଲେ ଦଳର ଶୀର୍ଷ ନେତାମାନଙ୍କୁ ଦେଖା ନକରି ଦିଲ୍ଲୀରୁ ଚାଲିଆସିଥିଲେ । ଆଉ ଏବେ ପୁଣି ଦିଲ୍ଲୀ ଯାଇ ସେମାନଙ୍କୁ ଫୋନ କରିଥିଲେ ମଧ୍ୟ ରାହୁଲ ଗାନ୍ଧି କିମ୍ବା ପ୍ରିୟଙ୍କା ଗାନ୍ଧି ତାଙ୍କ ଫୋନ ଉଠାଇ ନଥିବା ସୂଚନା ମିଳିଛି । ତେବେ ଥରେ କି ଦୁଇ ଥର ନୁହେଁ ଦୁଇଜଣଙ୍କୁ ୪୦ରୁ ୫୦ଥର କଲ କରିଛନ୍ତି ସଚିନ ପାଇଲଟ । କିନ୍ତୁ ଉଭୟ ତାଙ୍କୁ ଅଣଦେଖା କରିଛନ୍ତି । ଏନେଇ ସୂଚନା ଦେଇଛନ୍ତି ବିଜେପିର ରାଜ୍ୟସଭା ସାଂସଦ ଡକ୍ଟର କିରୋଧି ଲାଲ ମିଣା ।
ତେବେ ରାଜସ୍ଥାନରେ ସଚିନ ଓ ଗେହଲଟଙ୍କ କଳି କାହାକୁ ଅଛପା ନାହିଁ । ଦୁଇଜଣଙ୍କ ଶିବିର ଏବେ ଦୁଇଭାଗ । ଗଲା ବର୍ଷ ପାଇଲଟ ଉପ ମୁଖ୍ୟମନ୍ତ୍ରୀ ପଦ ଛାଡ଼ଥିଲେ । ଏହାସହ ଦଳ ଛାଡ଼ିବାକୁ ନିଷ୍ପତ୍ତି ନେଇଥିବା ଚର୍ଚ୍ଚା ହେଉଥିଲା । କିନ୍ତୁ ଦଳର ବହୁ ବରିଷ୍ଠ ନେତା ତାଙ୍କୁ ବୁଝା ସୁଝା କରିବା ପରେ ସେ ଶାନ୍ତ ରହିଥିଲେ । କିନ୍ତୁ ସେତେବେ ପାଇଲଟଙ୍କୁ ଦିଆଯାଇଥିବା ପ୍ରତିଶ୍ରୁତିକୁ ଏକ ବର୍ଷ ପୁରିଥିଲେ ମଧ୍ୟ ତାହା ପୁରଣ ହୋଇନି । ଯେଉଁ କାରଣରୁ ସେ ଏବେ ଅସନ୍ତୋଷ ପ୍ରକାଶ କରିଛନ୍ତି ।
ତେବେ ଏଥିପାଇଁ ମୁଖ୍ୟତଃ ଗେହଲଟ ଦାୟୀ ବୋଲି ପାଇଲଟଙ୍କ ସମର୍ଥକ ଦାବି କରୁଛନ୍ତି । ସେପଟେ ପାଇଲଟଙ୍କ ବିରୋଧ ସମୟରେ ତାଙ୍କ ସମର୍ଥନ କରୁଥିବା କିଛି ବିଧାୟକମାନେ ଏବେ ଗେହଲଟଙ୍କୁ ପ୍ରଶଂସା କରୁଥିବା ଦେଖିବାକୁ ମିଳିଛି । କିଛିଦିନ ପୂର୍ବରୁ ୟୁପିର ବଡ଼ ନେତା ଜିତିନ ପ୍ରସାଦ କଂଗ୍ରେସ ଛାଡ଼ି ବିଜେପିରେ ଯୋଗ ଦେବା ପରେ ଏବେ ସଚିନ ପାଇଲଟ ପୁଣି ସକ୍ରିୟ ହୋଇଛନ୍ତି । ଦିଲ୍ଲୀରେ ହାଇକମାଣ୍ଡ ଉପରେ ଚାପ ପକାଇବା ପାଇଁ ଦିଲ୍ଲୀରେ ପହଞ୍ଚିଥିଲେ ମଧ୍ୟ ତାଙ୍କୁ ଦଳ ଗୁରୁତ୍ୱ ଦେଉନଥିବା ଦେଖିବାକୁ ମିଳିଛି ।
