ଆସାମ-ମିଜୋରାମରେ ଭୟଙ୍କର ଗଣ୍ଡଗୋଳ: ୬ ପୋଲିସ ମୃତ

ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ଆସାମ ଓ ମିଜୋରାମରେ ଭୟଙ୍କର ଗଣ୍ଡଗୋଳ । ଦୀର୍ଘ ଦିନ ଧରି ଦୁଇ ରାଜ୍ୟ ମଧ୍ୟରେ ଲାଗି ରହିଛି ରହିଥିବା ସୀମା ବିବାଦ । ସେହି ବିବାଦ ବର୍ତ୍ତମାନ ହିଂସାର ରୂପ ନେଇଛି। ସୋମବାର ଉତ୍ତେଜନା ବେଳେ ହୋଇଥିଲା ଗୁଳିମାଡ଼ । ସେଥିରେ ଆସାମର ୬ଜଣ ପୁଲିସ ଅଧିକାରୀ ପ୍ରାଣ ହରାଇଛନ୍ତି । ୫୦ରୁ ଅଧିକ ଲୋକ ଆହତ ହୋଇଛନ୍ତି। ଉତ୍ତ୍ୟକ୍ତ ଲୋକେ ଏକାଧିକ ‌ପୁଲିସ ଭ୍ୟାନରେ ନିଆଁ ଲଗାଇଦେଇଛନ୍ତି। ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ବଶର୍ମା ଏହି ସୂଚନା ଦେଇଛନ୍ତି। ମିଜୋରାମର ବିଶୃଙ୍ଖଳକାରୀ ଲୋକ ଟେକାପଥର ମାଡ଼ କରିଥିଲେ ।

ଅନ୍ୟପକ୍ଷରେ ମିଜୋରାମରେ ସୋମବାର ୮ ଜଣ କୃଷକଙ୍କ କୁଡ଼ିଆକୁ ପୋଡ଼ି ଦିଆଯାଇଛି । ସୀମାରେ ହିଂସା ଲାଗି ରହିଥିବା ବେଳେ ଦୁଇ ରାଜ୍ୟର ମୁଖ୍ୟମନ୍ତ୍ରୀଙ୍କ ସହିତ କଥା ହୋଇଛନ୍ତି ସ୍ବରାଷ୍ଟ୍ର ମନ୍ତ୍ରୀ ଅମିତ୍‌ ଶାହ। ଘଟଣାସ୍ଥଳରେ ଦୁଇରାଜ୍ୟର ଅଧିକାରୀମାନେ ପରିସ୍ଥିତିକୁ ନିୟନ୍ତ୍ରଣ କରିବାକୁ ଉଦ୍ୟମ ଚଳାଇଛନ୍ତି। ଅନ୍ୟପକ୍ଷରେ ଏହି ଘଟଣାରେ ସ୍ବରାଷ୍ଟ୍ର ମନ୍ତ୍ରୀଙ୍କ ଜରୁରୀ ହସ୍ତକ୍ଷେପ ଲୋଡ଼ି ଦୁଇ ରାଜ୍ୟର ମୁଖ୍ୟମନ୍ତ୍ରୀ ଟ୍ବିଟ୍ କରିଛନ୍ତି। ଦୁଇ ମୁଖ୍ୟମନ୍ତ୍ରୀ ଏକାଧିକ ଟ୍ବିଟ୍ କରି ପରସ୍ପରକୁ ଦୋଷାରୋପ କରିଛନ୍ତି। ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ବ ଶର୍ମା ଏହି ଘଟଣା ପାଇଁ ମିଜୋରାମର ଅଧିକାରୀଙ୍କୁ ଦୋଷ ଦେଇଥିବାବେଳେ ମିଜୋରାମ ମୁଖ୍ୟମନ୍ତ୍ରୀ ଜୋରାମଥାଙ୍ଗା ଆସାମର ଅଧିକାରୀଙ୍କ ଉପରେ ଦୋଷ ଲଦିଛନ୍ତି।