କାନ୍ଦାହାର ପରେ ଏବେ ଆଫଗାନିସ୍ତାନର ରାଜଧାନୀ କାବୁଲ ଉପରେ ନଜର
ଭୁବନେଶ୍ୱର(ବଡ଼ ଖବର ବ୍ୟୁରୋ): ଦିନକୁ ଦିନ ଅଫଗାନିସ୍ତାନରେ ବଢ଼ୁଛି ତାଲିବାନଙ୍କ ଉପଦ୍ରବ । ଧୀରେ ଧୀରେ ଦେଶର ଅନେକ ସ୍ଥାନକୁ ନିଜ ଅକ୍ତିଆରକୁ ନେବାରେ ପ୍ରୟାସ ଜାରି ରଖିଛି ସଂଗଠନ । ଗୋଟିଏ ପରେ ଗୋଟିଏ ବଡ଼ ବଡ଼ ସହରକୁ ମଧ୍ୟ ନିଜ ଦଖଲକୁ ନେଇ ସାରିଛି । ଆଫଗାନିସ୍ତାନର ଦ୍ୱିତୀୟ ବଡ଼ ସହର କାନ୍ଦାହାରକୁ ଦଖଲ କରିଛି ତାଲିବାନ ସଂଗଠନ । ଏହାପରେ ଏବେ ଦେଶର ରାଜଧାନୀ କାବୁଲ ଦଖଲ କରିବାକୁ ମଧ୍ୟ ଆଗେଇଲାଣି ତାଲିବାନ ।
ତେବେ କାନ୍ଦାହାରକୁ ସମ୍ପୂର୍ଣ୍ଣ ଦଖଲ କରିବା ପରେ ସେଠାରେ ନିଜର ପତାକା ଉଡ଼ାଇଛି । ଆଫଗାନିସ୍ତାନ ସୁରକ୍ଷାକର୍ମୀଙ୍କ ସହ ତାଲିବାନର ଘମାଘୋଟ ଲଢ଼େଇ ପରେ ସୁରକ୍ଷାକର୍ମୀ ମାନେ ଆତ୍ମସମର୍ପଣ କରିଛନ୍ତି । ପ୍ରଥମେ କାନ୍ଦାହାରର ସେଣ୍ଟ୍ରାଲ ଜେଲ ଉପରେ ଆକ୍ରମଣ କରି କଏଦୀ ମାନଙ୍କୁ ମୁକ୍ତ କରିଦେଇଥିଲେ । ପରେ ସମ୍ପୂର୍ଣ୍ଣ ସହରକୁ ନିଜ ଅକ୍ତିଆରକୁ ଆଣିଥିଲେ । ତେବେ ତାଲିବାନ ପକ୍ଷରୁ କୁହାଯାଇଛି ଯେ, କାନ୍ଦାହାର ଏବେ ସମ୍ପୂର୍ଣ୍ଣ ଭାବେ ଆମ ଦଖଲରେ ଏବେ ଆମେ କାବୁଲ ଦଖଲ କରିବୁ ।
କାନ୍ଦାହାରଠାରୁ କାବୁଲର ଦୂରତା ହେଉଛି ୫୦୦ କିଲୋମିଟର । ତେଣୁ ଖୁବଶୀଘ୍ର ତାଲିବାନୀ ସେଠାରେ ପ୍ରବେଶ କରି ଦଖଲ କରିବାକୁ ଚେଷ୍ଟା କରିପାରନ୍ତି ବୋଲି ଆଶଙ୍କା କରାଯାଉଛି । ଆଉ ଯଦି ଏପରି ହୁଏ ତେବେ ଆଫଗାନସ୍ତାନ ସରକାରଙ୍କର ମଧ୍ୟ ତାଲିବାନ ସଂଗଠନ ନିକଟରେ ଆତ୍ମସମର୍ପଣ କରିବା ଛଡ଼ା ଅନ୍ୟ କୌଣସି ଉପାୟ ରହିବନି । ସେହିପରି କାନ୍ଦାହାର ପୂର୍ବରୁ ଦେଶର ତୃତୀୟ ବୃହତ୍ତମ ସହର ହେରାଟକୁ ମଧ୍ୟ ତାଲିବାନି ମାନେ ଦଖଲ କରିସାରିଛନ୍ତି ।
ଏହାମଧ୍ୟରେ ତାଲିବାନ ଆଫଗାନିସ୍ତାନର ୧୦ଟି ରାଜ୍ୟର ରାଜଧାନୀ ସହ ଅନ୍ୟାନ୍ୟ ସହରକୁ ମଧ୍ୟ ନିଜ କବଜାକୁ ନେଇ ସାରିଛି । ଆଫଗାନସ୍ତାନର ମୋଟ ୬୫% ବର୍ତ୍ତମାନ ତାଲିବାନୀ ମାନେ ଦଖଲ କରିସାରିଛନ୍ତି । ତେବେ ତାଲିବାନୀଙ୍କ ଲୋଲୁପ ଦୃଷ୍ଟି ସ୍ତ୍ରୀ ଓ ମହିଳାଙ୍କ ଉପରେ ରହିଛି ଯେଉଁଥିରେ ଭୟଭୀତ ହୋଇ ସୀମାକୁ ଲାଗି ରହିଥିବା ଶତାଧୀକ ଲୋକ ଏବେ ପାକିସ୍ତାନ ମୁହାଁ ହୋଇଛନ୍ତି । କିନ୍ତୁ ପାକିସ୍ତାନର ଇମ୍ରାନ ସରକାର ସେମାନଙ୍କ ପ୍ରବେଶ ଉପରେ ପ୍ରତିବନ୍ଧକ ଲଗାଇଛନ୍ତି । ସୀମାରେ ପ୍ରବେଶ କରିବାକୁ ଚେଷ୍ଟା କରୁଥିବା ପାକିସ୍ତାନ ସୁରକ୍ଷାକର୍ମୀ ସେମାନଙ୍କ ଉପରେ ଆକ୍ରମଣ କରିଛନ୍ତି ।