(ବଡ଼ ଖବର ବ୍ୟୁରୋ): ତାଲିବାନ କବଳରେ ଆଫଗାନିସ୍ତାନ ମିଡିଆ । ନିଜ ନିୟନ୍ତ୍ରଣରେ ରଖିଛନ୍ତି ତାଲିବାନ ଆତଙ୍କବାଦୀ । ମିଡିଆ ଜଗତରେ କାର୍ଯ୍ୟ କରୁଥୁବା ମହିଳାମାନଙ୍କୁ ବାରଣ କରୁଛନ୍ତି ଆତଙ୍କୀ । ତାଲିବାନ ସବୁ କ୍ଷେତ୍ରରେ ନିଜର ଆଧିପତ୍ୟ ବିସ୍ତାର କରିବାରେ ଲାଗିଛି । ମହିଳାଙ୍କୁ ସମ୍ମାନ ଦେବାକୁ ପ୍ରତିଶୃତି ଦେଇଥିବା ତାଲିବାନ ମହିଳାଙ୍କୁ ଆଦୌ ସହ୍ୟ କରିପାରୁନାହିଁ । ମହିଳା ସାମ୍ବାଦିକମାନଙ୍କୁ କାମ ବନ୍ଦ କରିବା ପାଇଁ ଧମକ ଦେଇଛି ତାଲିବାନ । ମହିଳା ସାମ୍ବାଦିକମାନେ ଭୟରେ ଥରହର ।
ମହିଳା କର୍ମଚାରୀମାନେ ଆଉ ଅଫିସ ଯାଉନାହାନ୍ତି । ରାଷ୍ଟ୍ରାୟତ୍ତ ଟିଭି ଆରଟିଏରେ କାମ କରୁଥିବା ଆଙ୍କର ସବନମ୍ ଦରୱାନ କହିଛନ୍ତି ତାଙ୍କୁ ଅଫିସ ନଯିବା ପାଇଁ ଆତଙ୍କୀମାନେ ଧମକ ଦେଇଛନ୍ତି । ବହୁ ଟିଭି ଚ୍ୟାନେଲର ମହିଳା ଆଙ୍କରମାନେ ଅନଲାଇନରେ ନ୍ୟୁଜ ପଢୁଥିବା ବେଳେ ତାଲିବାନ ଆତଙ୍କବାଦୀମାନେ ଗନ ପଏଣ୍ଟରେ ସେମାନଙ୍କୁ ଷ୍ଟୁଡିଓରୁ ବାହାର କରିଦେଇଥିଲେ ।
ପରେ ଏହି ଆତଙ୍କୀମାନଙ୍କ ମଧ୍ୟରୁ ଜଣେ ଲେଖାଏଁ ନ୍ୟୁଜ ପଢିଥିଲେ । ମିଡିଆକୁ ତାଲିବାନ ଆତଙ୍କବାଦୀମାନେ ନିଜ କବଜାକୁ ନେଇଥିବାରୁ ସମ୍ବାଦ ପରିବେଷଣରେ ନିରପେକ୍ଷତା ନେଇ ସନ୍ଦେହ ସୃଷ୍ଟି ହୋଇଛି । ଆତଙ୍କବାଦୀଙ୍କ ବର୍ବରତା ଯେପରି ଗଣମାଧ୍ୟମରେ ପ୍ରକାଶିତ ଓ ପ୍ରସାରିତ ନହେବ ସେଥିପାଇଁ ତାଗିଦ କରୁଛି ତାଲିବାନ ।
