ଭୁବନେଶ୍ୱର(ବଡ଼ ଖବର ବ୍ୟୁରୋ): ବନ୍ଧୁକ ମୁନରେ ଡରାଉଛନ୍ତି ଓଡ଼ିଆ ସିନେ ଅଭିନେତା । ସିନେମାରେ ନୁହେଁ ସତସତିକା ଏପରି କାଣ୍ଡ କରିଛନ୍ତି ଏହି ଅଭିନେତା ଜଣକ । ଖାଲି ବନ୍ଧୁକ ଦେଖାଉନାହାନ୍ତି, ମାଡ଼ ବି ମାରୁଛନ୍ତି । ଅଭିନେତାଙ୍କ ବିରୋଧରେ ନୟାପଲ୍ଲୀ ଥାନାରେ ଏନେଇ ଅଭିଯୋଗ ହୋଇଛି । ତେବେ ଏହି ସିନେ ଅଭିନେତା ଜଣକ ହେଉଛନ୍ତି ଓଲିଉଡ଼ର ଜଣାଶୁଣା ଅଭିନେତା ବବି ମିଶ୍ର । ଗତକାଲି ନିଶାସକ୍ତ ଅବସ୍ଥାରେ ସେ ନିଜ ପଡ଼ୋଶୀଙ୍କ ସହ ଏପରି କାଣ୍ଡ କରିଛନ୍ତି । ଯାହାକୁ ନେଇ ତାଙ୍କ ପଡ଼ୋଶୀ ନୟାପଲ୍ଲୀ ଥାନାରେ ଅଭିଯୋଗ କରିଛନ୍ତି ।
ତାଙ୍କ ପଡ଼ୋଶୀଙ୍କ ଅଭିଯୋଗ ମୁତାବକ ବବି ମିଶ୍ର ନୟାପଲ୍ଲୀ ଆଇଆରସି ଭିଲେଜର ଏନ-୧ରେ ଏକ ଆପାର୍ଟମେଣ୍ଟରେ ରହୁଛନ୍ତି । କୌଣସି କାରଣ ନେଇ ପଡ଼ୋଶୀଙ୍କ ସହ ବଚସା ହୋଇଥିଲା । ଏଥିରେ ଉତକ୍ଷିପ୍ତ ହୋଇ ବବି ଘରୁ ଏକ ବନ୍ଧୁକ ଆଣି ତାଙ୍କୁ ଧମକାଇଥିଲେ । ଏପରିକି ଆପାର୍ଟମେଣ୍ଟର ଅନ୍ୟାନ୍ୟ ଲୋକଙ୍କ ସହ ମିଶି ତାଙ୍କୁ ମାଡ଼ ମଧ୍ୟ ମାରିଥିଲେ । ତେବେ ପୋଲିସ ନିକଟରେ ଅଭିଯୋଗ ଆସିବା ପରେ ପୋଲିସ ତଦନ୍ତ ଆରମ୍ଭ କରିଛି । ଆପାର୍ଟମେଣ୍ଟ ପାଖାପାଖି ସିସି କ୍ୟାମେରାର ଯାଞ୍ଚ କରାଯାଇଛି । ତଦନ୍ତ ପରେ କାର୍ଯ୍ୟାନୁଷ୍ଠାନ ନିଆଯିବ ।
