ମୁମ୍ବାଇ(ବଡ଼ ଖବର ବ୍ୟୁରୋ): ବଲିଉଡର ଏଭରଗ୍ରୀନ୍ ହିରୋଇନ ରବିନା ଟଣ୍ଡନ ନିଜ ବିଉଟି ଏବଂ ଅଭିନୟର ଯାଦୁରେ ଲକ୍ଷ ଲକ୍ଷ ଦର୍ଶକଙ୍କ ହୃଦରେ ଏବେ ବି ରାଜ୍ କରୁଛନ୍ତି । ୯୦ ଦଶକରୁ ନିଜ କ୍ୟାରିୟର ଆରମ୍ଭ କରି ସେ ଅନେକ ସୁପରହିଟ ଫିଲ୍ମରେ ନଜର ଆସିଛନ୍ତି । ବଲିଉଡର ଅନେକ ନାମୀଦାମି ଆକ୍ଟରଙ୍କ ସହ ତାଙ୍କ କେମେଷ୍ଟ୍ରି ଖୁବ୍ ଜମିଛି । ବର୍ତ୍ତମାନ କିନ୍ତୁ ସେ ଆଉ ନାୟିକା ନୁହେଁ ବରଂ ଖଳନାୟିକା ଭୂମିକାରେ ଅବତୀର୍ଣ୍ଣ ହେବାକୁ ଯାଉଛନ୍ତି ।
ବଲିଉଡର ଥ୍ରୀଲର ମାଷ୍ଟର କୁହାଯାଉଥିବା ନିର୍ଦ୍ଦେଶକ ମନୀଷ ଗୁପ୍ତା ଏବେ ଅଭିନେତ୍ରୀ ରବିନା ଟଣ୍ଡନଙ୍କୁ ନେଇ ଏକ ଥ୍ରୀଲର ମୁଭି ନିର୍ମାଣ କରିବାକୁ ଯାଉଛନ୍ତି । ଯେଉଁଥିରେ ରବିନା ଜଣେ ଖଳନାୟିକା ଭୂମିକାରେ ଦେଖାଦେବେ । ପୂର୍ବରୁ ମନୀଷ ଦ ଷ୍ଟୋନମ୍ୟାନ ମଡର୍ସ, ହଷ୍ଟେଲ, ରହସ୍ୟ ଭଳି ଅନେକ ଥ୍ରୀଲର ମୁଭି ଦର୍ଶକଙ୍କୁ ଭେଟି ଦେବା ପରେ ଏବେ ଏକ ନୁଆ ଅନ୍ଦାଜରେ ଆଉ ଏକ ଥ୍ରୀଲର ମୁଭି ନିର୍ମାଣ କରିବାକୁ ଯାଉଛନ୍ତି । ତେବେ ରବିନାଙ୍କ ପାଇଁ ସ୍କ୍ରିନରେ ଖଳନାୟିକା ସାଜିବା କିଛି ବିଚିତ୍ର କଥା ନୁହେଁ । ଅନେକ ମୁଭିରେ ସେ ଭିନ୍ନ ଭିନ୍ନ ପ୍ରକାର କ୍ୟାରେକ୍ଟର ପ୍ଲେ କରି ସାରିଛନ୍ତି । କିନ୍ତୁ ୯୦ ଦଶକରୁ ଆଜି ପର୍ଯ୍ୟନ୍ତ ସେ ଅଧିକାଶଂ ମୁଭିରେ କେବଳ ନାୟିକା ଭୁମିକାରେ ନଜର ଆସିଛନ୍ତି ।
ବଲିଉଡ ମୁଭି ‘ପଥର କେ ଫୁଲ’ ଜରିଆରେ ଅଭିନୟ ଜଗତରେ ଏଣ୍ଟ୍ରି କରିଥିଲେ ରବିନା । ନିଜ ପ୍ରଥମ ମୁଭିରୁ ହିଁ ସେ ଫିଲ୍ମ ଫେୟାର ପୁରସ୍କାର ହାତେଇ ନେଇଥିଲେ । ପରେ ଲାଡଲା, ମେ ଖିଲାଡି ତୁ ଅନାଡି ଓ ଦାମନ ଚଳଚିତ୍ର ପାଇଁ ଫିଲ୍ମ ଫେୟାର ଓ ଜାତୀୟ ପୁରସ୍କାରରେ ସମ୍ମାନିତ ହୋଇଥିଲେ । ନିଜର ୩୦ ବର୍ଷର ଫିଲ୍ମ କ୍ୟାରିୟର ଭିତରେ ଅନେକ ହିଟ ସିନେମା ଭେଟି ଦେଇଛନ୍ତି ରବିନା । ଇନସାନିୟତ, ରଷକ, ଖିଲାଡିଓଁ କା ଖିଲାଡି, ମୋହରା, ଜଙ୍ଗ୍, ବଡେ ମିଆଁ ଛୋଟେ ମିଆଁ, ପେହଚାନ,ଏଲଓସି କାରଗିଲ ଭଳି ଅନେକ ଦମଦାର ମୁଭିରେ ଅଭିନୟ କରିଛନ୍ତି ରବିନା । ତେବେ ଖୁବଶୀଘ୍ର ରବିନାଙ୍କୁ ବିଗ୍ ବଜେଟ ମୁଭି ‘କେ.ଡି.ଏଫ୍ ଚାପ୍ଟର-୨’ରେ- ଦେଖିବାକୁ ମିଳିବ । ଅନେକ ଦିନ ହେବ ସେ ବଡ ପରଦାରେ ନଜର ଆସି ନଥିବାରୁ ତାଙ୍କ ଫାନ୍ସମାନେ ଏବେ କାଫି ଉତ୍ସାହିତ ହୋଇ ରହିଛନ୍ତି ।
