ରାଜା ମୃତ୍ୟୁ ଅବହେଳା ପାଇଁ ଆକ୍ସନ କାହିଁ ?

ଭୁବନେଶ୍ୱର(ବଡ଼ ଖବର ବ୍ୟୁରୋ): ରାଜା ମୃତ୍ୟୁ ପାଇଁ ଦାୟୀ କିଏ? ପରୋକ୍ଷରେ ହେଉ ବା ପ୍ରତ୍ୟକ୍ଷରେ। ଯିଏ ଦାୟୀ, ତାଙ୍କ ବିରୋଧରେ କାହିଁକି ହେବ ନାହିଁ ଆକ୍ସନ? କାହିଁକି ତାଙ୍କ ବିରୋଧରେ ନିଆଯିବ ନାହିଁ କାର୍ଯ୍ୟାନୁଷ୍ଠାନ । ଘଟଣା ଘଟିବାର ତିନି ଦିନ ବିତିଲା । ହେଲେ କାର୍ଯ୍ୟାନୁଷ୍ଠାନ ଶୂନ । ପୋଲିସ କାହିଁକି ଚୁପ । ସରକାରଙ୍କ ପକ୍ଷରୁ କାହିଁକି କାର୍ଯ୍ୟାନୁଷ୍ଠାନ ଗ୍ରହଣ କରୁ ନାହାନ୍ତି । ଏଭଳି ଅନେକ ପ୍ରଶ୍ନ ଏବେ ସାମ୍ନାକୁ ଆସୁଛି । ଯାହାର ଉତ୍ତର କେବଳ ରାଜ୍ୟ ସରକାର ଏବଂ ପୋଲିସ ପାଖରେ ।

ରାଜଧାନୀର ମୁକୁଳା ଡ୍ରେନରେ ପଡି ଜ୍ୟୋତିପ୍ରକାଶ ଓରଫ ରାଜାର ଜୀବନ ଗଲା । ପରିବାର ଲୋକଙ୍କ ଅଭିଯୋଗ । ବିଏମସି ଯଦି ମୁକୁଳା ଡ୍ରେନରେ ସ୍ଲାବ୍ର ବ୍ୟବସ୍ଥା କରି ଥାଆନ୍ତା । ତେବେ ରାଜାର ଜୀବନ ବଞ୍ଚି ଯାଇଥାନ୍ତା । ଏଥିପାଇଁ ବିଏମସି ଦାୟୀ । ବିଏମସି କମିଶନର ଦାୟୀ । ସେପଟେ ବିଜେପି ଏବଂ କଂଗ୍ରେସର ଅଭିଯୋଗ ଏହି ଘଟଣା ପାଇଁ ରାଜ୍ୟ ସରକାର ଦାୟୀ । ନଗର ଉନ୍ନୟନ ବିଭାଗର ମନ୍ତ୍ରୀ, ସଚିବ ଦାୟୀ । ମନ୍ତ୍ରୀ ଅଶୋକ ପଣ୍ଡା ଏବଂ ପୂର୍ବତ୍ତନ ମେୟର ତଥା ବିଧାୟକ ଅନନ୍ତ ନାରାୟଣ ଜେନା ଦାୟୀ । ଏପରିକି ଭୁବନେଶ୍ୱର ସାଂସଦ ବି ଦାୟୀ । ସର୍ବପରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବି ଦାୟୀ । ଏହାକୁ ନେଇ କଂଗ୍ରେସ ଏବଂ ବିଜେପି ଥାନାରେ ଦାୟର କରିଛନ୍ତି ମାମଲା । ହେଲେ ଏଯାଏଁ ସରକାରୀ ଭାବେ ତଦନ୍ତ ପାଇଁ କୌଣସି ପଦକ୍ଷେପ ନିଆଯାଇ ନାହିଁ ।

ବିଏମସି ତଥା ନଗର ଉନ୍ନୟନ ବିଭାଗର ଅପରାଗ ପଣିଆ ଯୋଗୁ ଜଣେ କୋଳଳମତି ଶିଶୁ ଜୀବନ ଚାଲିଗଲା । ହେଲେ ସମସ୍ତେ ଚୁପ । ତା ଅର୍ଥ ଆମେ ବୁଝିବା କି ଏଥିପାଇଁ କେହି ଦାୟୀ ନୁହନ୍ତି । ଶାସକ ଦଳର ନେତା ମନ୍ତ୍ରୀ, ବିଧାୟକ କେହି ଦୋଷି ନୁହନ୍ତି । ବିଏମସି କମିଶନର ଏବଂ ନଗର ଉନ୍ନୟନ ବିଭାଗର ସଚିବ ଭୁଲ କରି ନାହାନ୍ତି । ଏ ପ୍ରଶ୍ନ ବଡ଼ ଖବରର ?