ଭୁବନେଶ୍ୱର(ବଡ଼ ଖବର ବ୍ୟୁରୋ): ମାଡ଼ି ଆସୁଛି ଗୁଲାବ । ସନ୍ଧ୍ୟା ୬ ପୂର୍ବରୁ ଲ୍ୟାଣ୍ଡଫଲ ପ୍ରକ୍ରିୟା ଆରମ୍ଭ ହେବାକୁ ଯାଉଛି । କଳିଙ୍ଗପଟ୍ଟନମ ଓ ଗୋପାଳପୁର ମଧ୍ୟ ଦେଇ ଗତି କରିବ ଗୁଲାବ । ୧୧ଟି ଜିଲ୍ଲାରେ ଗୁଲାବର ଅଧିକା ପ୍ରଭାବ ରହିବ । ଏସବୁ ଜିଲ୍ଲାରେ ପ୍ରବଳ ବର୍ଷା ସହ ଘଣ୍ଟା ପ୍ରତି ୯୫ କିମି ପର୍ଯ୍ୟନ୍ତ ପବନ ବୋହିବ ବୋଲି ସୂଚନା ମିଳିଛି । ଏଥି ପାଇଁ ଏସବୁ ଜିଲ୍ଲାର ଲୋକମାନଙ୍କୁ ପାହାଡ଼ିଆ ଅଞ୍ଚଳରେ ଥିବା ଗୁମ୍ପା ଓ ସମ୍ବେଦନଶୀଳ ସ୍ଥାନରେ ଆଶ୍ରୟ ନ ନେବା ପାଇଁ ପରାମର୍ଶ ଦିଆଯାଇଛି । ବାତ୍ୟା ପ୍ରଭାବରେ ଓଡ଼ିଶାରେ ଘଣ୍ଟା ପ୍ରତି ୮୦ରୁ ୯୫ କିମି ପର୍ଯ୍ୟନ୍ତ ପବନ ବୋହିବା ସହ ପ୍ରବଳ ବର୍ଷା ହେବାର ସମ୍ଭାବନା ରହିଛି । ମୁଖ୍ୟତଃ ଗଞ୍ଜାମ ଓ ଗଜପତି ଜିଲ୍ଲାରେ ଏହାର ପ୍ରଭାବ ଅଧିକ ରହିବ ।
ସେପଟେ ବାତ୍ୟାର ମୁକାବିଲା ପାଇଁ ସରକାର ଆଗୁଆ ପଦକ୍ଷେପ ଗ୍ରହଣ କରିଛନ୍ତି । ଏନେଇ ୪୨ଟି ଓଡ୍ରାଫ ଟିମ, ୨୪ଟି ଏନଡିଆରଏଫ ଟିମ ଓ ୧୦୩ଟି ଅଗ୍ନିଶମ ଦଳକୁ ମୁତୟନ କରାଯାଇଛି । ଅନ୍ୟପଟେ ଗଜପତିରେ ଭୂସ୍କଳନ ହୋଇଥିବାର କଥା ସାମ୍ନାକୁ ଆସିଥିଲା । ଭୂସ୍କଳନ ଯୋଗୁଁ ଗଜପତି ଗୁମ୍ମା ବ୍ଲକରେ ମାଟି ଧସି ରାସ୍ତା ଅବରୋଧ ହୋଇଥିଲା । ଏହା ପୂର୍ବରୁ ୨୦୧୮ ମସିହାରେ ତିତିଲି ବାତ୍ୟା ସମୟରେ ମଧ୍ୟ ଗଜପତି ଜିଲ୍ଲାରେ ଭୂସ୍କଳନ ହୋଇଥିଲା । ବାତ୍ୟା ପ୍ରଭାବରେ କେନ୍ଦ୍ରାପଡ଼ା, ଜଗତସିଂହପୁର, କଟକ, ଖୋର୍ଦ୍ଧା, ପୁରୀ, ଭଦ୍ରକ, ବାଲେଶ୍ୱର ଆଦି ଜିଲ୍ଲାରେ ମଧ୍ୟ ପ୍ରବଳ ବର୍ଷା ହେବାର ଆଶଙ୍କା ରହିଛି । ଏସବୁ ଜିଲ୍ଲାରେ ୱେଲୋ ୱାର୍ଣିଂ ଜାରି କରାଯାଇଛି ।
ଅନ୍ୟପଟେ ବାତ୍ୟାକୁ ଦୃଷ୍ଟିରେ ରଖି ରାଜ୍ୟର ମୋଟ ୧୧ଟି ଜିଲ୍ଲାରେ ଆସନ୍ତାକାଲି ସ୍କୁଲ ଓ ଅନ୍ୟ ସମସ୍ତ ଶିକ୍ଷାନୁଷ୍ଠାନ ଗୁଡ଼ିକ ବନ୍ଦ ରଖିବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି । ଏନେଇ ନୂଆଦିଲ୍ଲୀରୁ ଭିଡ଼ିଓ କନଫରେନ୍ସିଂ ଯୋଗେ ମୁଖ୍ୟମନ୍ତ୍ରୀ ୧୧ଟି ଜିଲ୍ଲାର ଜିଲ୍ଲାପାଳଙ୍କୁ ନିର୍ଦ୍ଦେଶ ଦେଇଥିଲେ । ବାତ୍ୟା ୟାସ ପରବର୍ତ୍ତୀ ସମୟରେ ଯେପରି ପ୍ରଭାବିତ ଅଞ୍ଚଳ ମାନଙ୍କରେ କୋଭିଡ଼ ସଂଖ୍ୟା ବୃଦ୍ଧି ଘଟିଥିଲା । ଏହାକୁ ଦୃଷ୍ଟିରେ ରଖି ବାତ୍ୟା ଆଶ୍ରୟସ୍ଥଳ ମାନଙ୍କରେ କୋଭିଡ଼ ନିୟମାବଳୀକୁ କଡ଼ାକଡ଼ା ଭାବରେ ପାଳନ କରାଯାଉଥିବାର ସୂଚନା ମିଳିଛି ।
