ଗାଁ ମୁହାଁ ୬୦ ଟିକିଆ ହାତୀପଲ,ଚମ୍ପୁଆରେ ଭୟ

କେନ୍ଦୁଝର (ବଡ଼ ଖବର ବ୍ୟୁରୋ):କେନ୍ଦୁଝରରେ ଝାଡ଼ଖଣ୍ଡି ହାତୀପଲଙ୍କ ଆତଙ୍କ । ୬୦ଟିକିଆ ହାତୀପଲକୁ ନେଇ ଲୋକେ ଭୟଭୀତ । ଚମ୍ପୁଆ ରେଞ୍ଜର ବାଲିବନ୍ଧ ଫରେଷ୍ଟ ବିଟ ଅଞ୍ଚଳକୁ ରବିବାର ୬୦ଟିକିଆ ଝାଡଖଣ୍ଡି ହାତୀପଲ ଧଶେଇ ପଶିଥିଲେ । ଆଜି ଏହି ହାତିପଲ ଗୁଡ଼ିକ ତିନି ଭାଗ ହୋଇ ପାର୍ବତିପୁର, ହରିଡ଼ାଯୋଡ଼ି ଓ କାଞ୍ଜିଆପାଣି ଅଞ୍ଚଳରେ ଉତ୍ପାତ ମଚାଇଛନ୍ତି । ଦିନ ବେଳା ହାତୀପଲ ଜଙ୍ଗଲରେ ରହୁଥିବା ବେଳେ ସଞ୍ଜ ନଇଁଲେ ଗାଁ ମୁହାଁ ହେଉଛନ୍ତି ପଲ । ଧାନବିଲର ପଶି ବ୍ୟାପକ କ୍ଷତି କରିଛନ୍ତି ହାତୀ ପଲ । କିଛିଦିନ ତଳେ ପୁରୁଣାପାଣି ଗାଁରେ ଜଣେ ବ୍ୟକ୍ତିଙ୍କୁ ହାତୀ ପଲ ଦଳି ଦେଇଥିଲେ । ଏହି ଘଟଣା ମନରୁ ନଲିଭୁଣୁ ହାତିପଲ ପୁଣି ଉତ୍ପାତ ଆରମ୍ଭ କରିଦେଇଛନ୍ତି । ଫଳରେ ଲୋକେ ଆତଙ୍କିତ ହୋଇ ହୋପଡ଼ିଛନ୍ତି । ସନ୍ଧ୍ୟା ହେଲେ ଲୋକେ ପଦାକୁ ବାହାରିବା ପାଇଁ ଡ଼ରୁଛନ୍ତି । ପ୍ରତିବର୍ଷ ଝାଡ଼ଖଣ୍ଡି ହାତୀପଲ ପାଇଁ ଅନେକ ଧନ ଜୀବନ ବିପଦରେ ପଡ଼ୁଛି । ବନ ବିଭାଗ ହାତୀ ଗୁଡ଼ିକୁ ତୁରନ୍ତ ଘଉଡାଇବା ପାଇଁ ବ୍ୟବସ୍ଥା ଗ୍ରହଣ କରିବାକୁ ଦାବି ହୋଇଛି ।