ଶପଥ ନେଲେ ରୁଦ୍ର ପ୍ରତାପ ମହାରଥୀ
ଭୁବନେଶ୍ୱର(ବଡ଼ ଖବର ବ୍ୟୁରୋ): ଶପଥ ନେଲେ ପିପିଲି ଉପନିର୍ବାଚନରେ ବିଜୟୀ ହୋଇଥିବା ରୁଦ୍ର ପ୍ରତାପ ମହାରଥୀ । ପିପିଲିର ବିଧାୟକ ଭାବେ ଆଜି ଶପଥ ନେଇଛନ୍ତି । ବିଧାନସଭାରେ ଆଜି ତାଙ୍କୁ ପଦ ଓ ଗୋପନୀୟତାର ଶପଥପାଠ କରାଇଛନ୍ତି ବାଚସ୍ପତି ସୂର୍ଯ୍ୟ ନରାୟଣ ପାତ୍ର । ଶପଥରେ ସେ କହିଛନ୍ତି ଅଞ୍ଚଳର ବିକାଶ ମୋର ପ୍ରଥମ ଲକ୍ଷ । ଆଜି ଶପଥ ନେବା ପରେ କାଲିଠୁ ବିକାଶ ନମନ୍ତେ କାର୍ଯ୍ୟ ଆରମ୍ଭ କରିବି ।
ପିପିଲି ଉପନିର୍ବାଚନରେ ବିଜେଡିର ପ୍ରାର୍ଥୀ ରୁଦ୍ର ପ୍ରତାପ ମହାରଥୀ ବାଜି ମାରି ନେଇଛନ୍ତି । ବିଜେପି ନେତା ଆଶ୍ରିତ ପଟ୍ଟନାୟକଙ୍କୁ ୨୦ ହଜାର ଭୋଟରେ ହରାଇ ପିପିଲି ଆସନ ହତେଇଛନ୍ତି । ରୁଦ୍ର ମୋଟ ୯୬ ହଜାର ଭୋଟରେ ଜିତିଛନ୍ତି । ସୂଚନା ଅନୁଯାୟୀ, ସ୍ୱର୍ଗତ ପ୍ରଦୀପ ମହାରଥୀଙ୍କ ମୃତ୍ୟୁ ପରେ ରୁଦ୍ର ପିପିଲି ଉପନିର୍ବାଚନରେ ଜିତି ବିଧାୟକ ହୋଇଛନ୍ତି । ପୁଣିଥରେ ମହାରଥୀଙ୍କ ହାତରେ ପିପିଲି ଆସନ । ପିପିଲି ବିଧାନସଭା ନିର୍ବାଚନ ମଣ୍ଡଳିରେ ୨ ଲକ୍ଷ ୨୯ ହଜାର ୯୯୮ ଜଣ ଭୋଟରେ ଥିବା ବେଳେ ସେମାନଙ୍କ ମଧ୍ୟରୁ ୭୮.୨୫% ସେମାନଙ୍କ ମତ ସାବ୍ୟସ୍ତ କରିଥିଲେ ।