ପଟ୍ଟାଙ୍ଗି(ବଡ଼ ଖବର ବ୍ୟୁରୋ): କୋଟିଆର ଭିତ୍ତିଭୂମି ବିକାଶରେ ଓଡ଼ିଶା ସରକାର ଅବହେଳା କରିଛନ୍ତି। ଲୋକଙ୍କୁ ଆପଣେଇବା ସହ ଭାଗବତ ସମ୍ପର୍କ ସ୍ଥାପନ କରିବାରେ ମଧ୍ୟ ବିଫଳ ହୋଇଛନ୍ତି। ଯାହାର ଫାଇଦା ଉଠାଉଛି ପଡୋଶୀ ଆନ୍ଧ୍ର। ଆନ୍ଧ୍ର ସରକାର ଲୋକଙ୍କ ସହ ସମ୍ପର୍କ ରଖି ବ୍ୟକ୍ତିଗତ ସ୍ତରରେ ସରକାରୀ ସହାୟତା ଓ ସହଯୋଗ କରୁଥିବାରୁ ଲୋକେ ଏବେ ଆନ୍ଧ୍ର ମୁହାଁ। ରାଜ୍ୟ ସରକାର ଏନେଇ ତ୍ଵରିତ ପଦକ୍ଷେପ ନେବାକୁ ଓଡ଼ିଶା ନାଗରିକ ମହାମଞ୍ଚ ଦାବି କରିଛି। ଏହାସହ ସୀମାନ୍ତ ଅଞ୍ଚଳ ବାସୀଙ୍କ ପାଇଁ ସ୍ଵତନ୍ତ୍ର ଯୋଜନା କରିବାକୁ ଦାବି କରିଛନ୍ତି। କୋରାପୁଟ ଜିଲ୍ଲା ପଟ୍ଟାଙ୍ଗି ବ୍ଲକ କୋଟିଆର ୨୨ଟି ଗାଁରେ ପହଞ୍ଚି ସୀମା ଅନୁଧ୍ୟାନ କରିଛନ୍ତି ଓଡ଼ିଶା ନାଗରିକ ମହାମଞ୍ଚର କର୍ମକର୍ତ୍ତା। ଏହାସହ ଜିଲ୍ଲାର କୁରୁଡିପଦର, ଗଞ୍ଜେଇପଦର, କୋଟିଆ, ସେମି, ଧୂଳିପଦର ଓ ନେରେଡି ବାଲସାରେ ପହଞ୍ଚି ସ୍ଥାନୀୟ ଲୋକଙ୍କ ସୁଖ ଦୁଃଖ ବୁଝିଛନ୍ତି। ଓଡ଼ିଶା ନାଗରିକ ମହାମଞ୍ଚର ଅଧ୍ୟକ୍ଷ ତଥା ବରିଷ୍ଠ ସାମ୍ବାଦିକ ପ୍ରଦ୍ୟୁମ୍ନ ସତପଥୀଙ୍କ ନେତୃତ୍ଵରେ ସୀମାନ୍ତ ବୁଲି ଦେଖିବା ସହ ନାମ ଫଳକ ପୋତିଛନ୍ତି।
