କରୋନା କାଳରେ ପ୍ରଧାନମନ୍ତ୍ରୀ କ’ଣ କହିଲେ, ପଢନ୍ତୁ ପୂରା ଖବର

ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ମଙ୍ଗଳବାରକୁ ମିଶାଇ କରୋନା ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସପ୍ତମ ଥର ପାଇଁ ଦେଶକୁ ସମ୍ବୋଧିତ କରିଛନ୍ତି। ସେ କରୋନା ଜୀବାଣୁ ସଂକ୍ରମଣ ଏବଂ ଟିକା ଉପରେ ନିଜର ମତ ରଖିଥିଲେ। ଆଗାମୀ ସମୟରେ ଅଧିକ ସତର୍କତା ଅବଲମ୍ବନ କରିବାକୁ ସେ ଲୋକଙ୍କୁ ନିବେଦନ କରିଛନ୍ତି। ଆମେରିକା ପରେ ଭାରତ ବିଶ୍ୱର ଦ୍ୱିତୀୟ ସର୍ବାଧିକ ପ୍ରଭାବିତ ଦେଶ । ଏବେ ଚାଲିଛି ପାର୍ବଣ ଋତୁ । ପୂଜାମଣ୍ଡପ ଓ ବିଭିନ୍ନ ଉତ୍ସବରେ ବହୁ ଲୋକଙ୍କ ସମାଗମ ହେବାର ଆଶଙ୍କା ଅଧିକ । ତେଣୁ ଅଧିକ ସଂକ୍ରମଣ ହେବାର ଆଶଙ୍କା ରହିଛି । କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ଠାରୁ ଆରମ୍ଭ କରି ଆଇସିଏମଆର ପର୍ୟ୍ୟନ୍ତ ଏ ସମ୍ପର୍କରେ ଅଧିକ ଚିନ୍ତା କରୁଛନ୍ତି ।

ପ୍ରଧାନମନ୍ତ୍ରୀ କହିଛନ୍ତି ଯେ ଜନତା କର୍ଫ୍ୟୁ ଠାରୁ ଆଜି ପର୍ଯ୍ୟନ୍ତ ଦେଶବାସୀ କରୋନା ବିରୋଧରେ ଲଢେଇ ଜାରି ରଖିଛନ୍ତି । ଅର୍ଥନୈତିକ କାର୍ଯ୍ୟକଳାପ ମଧ୍ୟ ସମୟ ସହିତ ଦ୍ରୁତ ଗତିରେ ବୃଦ୍ଧି ପାଉଛି । ନିଜର ଆବଶ୍ୟକତା ପୂରଣ ପାଇଁ ଘରୁ ବାହାରକୁ ଯିବାକୁ ପଡୁଛି । ମାତ୍ର ସତର୍କତା ନିହାତି ଜରୁରୀ । ଆମେ ଭୁଲିଯିବା ଉଚିତ୍ ନୁହେଁ ଯେ ଲକଡାଉନ୍ ଚାଲିଯାଇଛି, ମାତ୍ର ଭାଇରସ୍ ଯାଇନାହିଁ । ସେବା ପରମୋ ଧର୍ମର ମନ୍ତ୍ର ଅନୁସରଣ କରି: ଆମର ଡାକ୍ତର, ନର୍ସ, ସ୍ୱାସ୍ଥ୍ୟକର୍ମୀମାନେ ନିସ୍ୱାର୍ଥପର ଭାବରେ ସେବା କରୁଛନ୍ତି । ବର୍ତ୍ତମାନ ବେପରୁଆ ହେବାର ସମୟ ନୁହେଁ । ଯଦି ଆପଣ ମାସ୍କ ବିନା ବାହାରକୁ ଯାଉଛନ୍ତି, ତେବେ ଆପଣ ନିଜକୁ, ଆପଣଙ୍କ ପରିବାରକୁ ଅସୁବିଧାରେ ପକାଉଛନ୍ତି । ଆମେରିକା ହେଉ କିମ୍ବା ୟୁରୋପର ଅନ୍ୟ ଦେଶରେ କରୋନା ମାମଲା ହ୍ରାସ ପାଉଥିଲା, କିନ୍ତୁ ହଠାତ୍ ପୁନର୍ବାର ବୃଦ୍ଧି ପାଇବାରେ ଲାଗିଛି । ସଫଳତା ହାସଲ ନହେବା ପର୍ଯ୍ୟନ୍ତ, ଅବହେଳା କର ନାହିଁ । ଏହି ମହାମାରୀର ଟିକା ଆସିବା ପର୍ୟ୍ୟନ୍ତ, ଆମେ କରୋନା ସହିତ ଆମର ଯୁଦ୍ଧକୁ ଦୁର୍ବଳ ହେବାକୁ ଦେବା ନାହିଁ । ଆମ ଦେଶର ବୈଜ୍ଞାନିକମାନେ ଟିକା ପାଇଁ କଠିନ ପରିଶ୍ରମ କରୁଛନ୍ତି। ବର୍ତ୍ତମାନ ଭାରତରେ ଅନେକ କରୋନା ଟିକା ଚାଲିଛି । ଏଥିମଧ୍ୟରୁ କିଛି ଉନ୍ନତ ସ୍ତରରେ ଅଛି ଯେତେବେଳେ କରୋନା ଟିକା ଆସିବ, ସରକାର ପ୍ରତ୍ୟେକ ଭାରତୀୟଙ୍କ ପାଖରେ ଯଥାଶୀଘ୍ର ପହଞ୍ଚିବା ପାଇଁ ପ୍ରସ୍ତୁତ ହେଉଛନ୍ତି। ଟିକା ପ୍ରତ୍ୟେକ ନାଗରିକଙ୍କ ନିକଟରେ ଯେପରି ପହଞ୍ଚି ପାରିବ ସେଥିପ୍ରତି ସରକାର ବିଷଶଷ ଧ୍ୟାନ ଦେଉଛନ୍ତି । ଟିକିଏ ଅସାବଧାନତା ଆମକୁ ବିପଦରେ ପକାଇପାରେ ବୋଲି ପ୍ରଧାନମନ୍ତ୍ରୀ କହିଛନ୍ତି ।