ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ଏପର୍ଯ୍ୟନ୍ତ କେତେ ଜଣ ଗିରଫ ହୋଇଛନ୍ତି ? କାଲି ସୁଦ୍ଧା ଷ୍ଟାଟର୍ସ ରିପୋର୍ଟ ଦାଖଲ କରନ୍ତୁ । ଏହି ମାମଲାର ଅଭିଯୁକ୍ତ କିଏ ? କାହା ବିରୋଧରେ ଏଫଆଇଆର ପଞ୍ଜୀକୃତ ହୋଇଛି ? ରାଜ୍ୟ ସରକାରଙ୍କ ସହ କଥା ହେବା ପରେ ନିର୍ଦ୍ଦେଶନାମା ଆଣନ୍ତୁ ବୋଲି ପ୍ରଧାନ ବିଚାରପତି ଏନଭି ରମନ୍ନାଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ ଏହି ମାମଲାର ଶୁଣାଣି କରି କହିଛନ୍ତି । ଏହା ସହ ମୃତ କୃଷକ ଲଭପ୍ରୀତ ସିଂହଙ୍କ ମା’ଙ୍କ ପାଇଁ ସହାୟତା ପ୍ରଦାନ କରିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି । ସେପଟେ ପୁଅର ମୃତ୍ୟୁ ଖବର ଶୁଣି ମା’ ଅତ୍ୟନ୍ତ ଭାଙ୍ଗିପଡ଼ିଥିଲେ । ଅନ୍ୟପଟେ ଏହି ମାମଲାରେ ଏକ ଏସଆଇଟି ଗଠନ କରାଯାଇଛି । ଏହା ସହ ଏକ ଅନୁସନ୍ଧାନ କମିଶନ ମଧ୍ୟ ଗଠନ କରାଯାଇଛି ବୋଲି ୟୁପି ସରକାରଙ୍କ ପକ୍ଷରୁ ଆଡଭୋକେଟ ଗରିମା ପ୍ରସାଦ ସୁପ୍ରିମକୋର୍ଟଙ୍କୁ କହିଛନ୍ତି ।
କାଲି ରାଜ୍ୟ ସରକାରଙ୍କ ସହ କଥା ହେବା ପରେ ନିର୍ଦ୍ଦେଶନାମା ଆଣନ୍ତୁ । ଏବଂ ଏହି ମାମଲାରେ ହାଇକୋର୍ଟରେ କେତେ ଆବେଦନ କରାଯାଇଛି ତାହାର ଏକ ଷ୍ଟାଟସ ରିପୋର୍ଟ ଦାଖଲ କରନ୍ତୁ ବୋଲି ଏନଭି ରମନ୍ନା କହିଛନ୍ତି । କେବଳ ଏତିକି ନୁହେଁ ବରଂ ଏହି ମାମଲାରେ କେତେ ଜଣ ଗିରଫ ହୋଇଛନ୍ତି ଓ କେତେଜଣ ଅଭିଯୁକ୍ତ ଅଛନ୍ତି, ଏସବୁର ରିପୋର୍ଟ ମାଗିଛି ସୁପ୍ରିମକୋର୍ଟ । ଅକ୍ଟୋବର ୩ ତାରିଖରେ ଲଖିମପୁର ଖେରିରେ ଆନ୍ଦୋଳନ କରୁଥିବା ଚାଷୀଙ୍କ ଉପରେ ଗାଡ଼ି ମଡ଼ାଇ ଦିଆଯାଇଥିଲା । ଏଥିରେ ୪ ଜଣ ଚାଷୀ ପ୍ରାଣ ହରାଇଥିଲେ । ପରେ ଘଟିଥିବା ହିଂସା କାଣ୍ଡରେ ଆଉ ୪ ଜଣଙ୍କର ମୃତ୍ୟୁ ଘଟିଥିଲା ।
ଏଖବର ସାମ୍ନାକୁ ଆସିବା ପରେ ସାରା ଦେଶ ସ୍ତବ୍ଧ ହୋଇ ଯାଇଥିଲା । ଏନେଇ ରାଜନୀତି ମଧ୍ୟ ଆରମ୍ଭ ହୋଇଯାଇଛି । କିଏ ଘଟଣାସ୍ଥଳରେ ପହଞ୍ଚିବା ପାଇଁ ଚେଷ୍ଟା କରୁଛନ୍ତି ତ ଆଉ କିଏ ଶାସକ ଦଳକୁ ଟାର୍ଗେଟ କରୁଛନ୍ତି । ଏସବୁ ମଧ୍ୟରେ ଚାଷୀଙ୍କ ପ୍ରସଙ୍ଗରେ ଆଜି ସୁପ୍ରିମକୋର୍ଟ ଶୁଣାଣି କରିଛନ୍ତି ।
