ପାନୀୟ ଜଳରୁ ବଞ୍ଚିତ ଲୁହୁରାମୁଣ୍ଡା ଗ୍ରାମବାସୀ

ବଲାଙ୍ଗିର (ବଡ଼ ଖବର ବ୍ୟୁରୋ): ବଲାଙ୍ଗିର ଜିଲ୍ଲା ଲୋଇସିଂହା ଥାନା ତଥା ଆଗଲପୁର ବ୍ଲକ ଲୁହୁରାମୁଣ୍ଡା ଗ୍ରାମର ସରକାରୀ ଜାଗାରେ ହେଇଥିବା ପାନୀୟ ଜଳ ଯୋଗାଣ ପ୍ରକଳ୍ପ ଓଭର ହେଡ଼ ଟ୍ୟାଙ୍କକୁ ବନ୍ଦ କରି ଗ୍ରାମର ପୁଡ଼ୁ ନାଗ ନାମକ ଜନୈକ ବ୍ୟକ୍ତି ରାସ୍ତା ଅବରୋଧ କରିଛନ୍ତି । ପାନୀୟ ଜଳ ପ୍ରକଳ୍ପ ନିର୍ମାଣ ହୋଇଥିବା ସ୍ଥାନକୁ ସେ ନିଜର ଜମି ବୋଲି ଦାବି କରି ଜଳ ଯୋଗାଣକୁ ବନ୍ଦ କରି ଦେଇଛନ୍ତି ।

ଫଳରେ ଗତ ୩ ଦିନ ହେଲା ଲୁହୁରାମୁଣ୍ଡା ଗ୍ରାମବାସୀ ପାନୀୟ ଜଳ ପାଇବାରୁ ବଞ୍ଚିତ ରହିଛନ୍ତି । ଗ୍ରାମର ଶତାଧିକ ବ୍ୟକ୍ତି ତଥା ୧୦ ଟି ସ୍ୱୟଂ ସହାୟିକା ଗୋଷ୍ଠୀର ମହିଳା ଆସି ପୁଡ଼ୁ ନାଗଙ୍କୁ ବୁଝାସୁଝା କରିଥିଲେ ମଧ୍ୟ କୌଣସି ସୁଫଳ ମିଳିପାରି ନାହିଁ । ସରକାରୀ ଜମିକୁ ନିଜର ଜମି ବୋଲି ଦାବି କରି ପୁଡୁ ନାଗ ଆପତ୍ତି କରିବାରୁ ଗ୍ରାମକୁ ଜଳ ଯୋଗାଣ ବନ୍ଦ ରହିଥିବା ଜଣାଯାଇଛି । ଏ ନେଇ ଗ୍ରାମରେ ଉତେଜନା ପ୍ରକାଶ ପାଇଛି ।