ଭୁବନେଶ୍ୱର (ବଡ଼ ଖବର ବ୍ୟୁରୋ): କରୋନା ଏବେ ଧୀରେ ଧୀରେ କମିବାରେ ଲାଗିଛି । ବିଭିନ୍ନ କ୍ଷେତ୍ର ସ୍ୱାଭାବିକ ହେଉଥିବାବେଳେ ମନ୍ଦିରଗୁଡିକ ବନ୍ଦ ରହିବାରୁ ଭକ୍ତ ବାୟା । ଭକ୍ତଙ୍କୁ ନଦେଖି ଠାକୁର ମଧ୍ୟ ବିଚଳିତ । ମନ୍ଦିରକୁ ଆଶ୍ରା କରି ଜୀବିକା ନିର୍ବାହ କରୁଥିବା ଲୋକମାନଙ୍କର ଜୀବନ ଦୁର୍ବିସହ । ମନ୍ଦିର ଖୋଲିବା ଦାବିରେ ସେବାୟତମାନେ ରାଜରାସ୍ତାକୁ ଓହ୍ଲାଇଛନ୍ତି । ଏଭଳି ସ୍ଥିତିରେ ରାଜ୍ୟର ମନ୍ଦିରଗୁଡିକ ଖୋଲିବା ପାଇଁ ସରକାରୀ ପ୍ରକ୍ରିୟା ଆରମ୍ଭ ହୋଇଛି । କୋଭିଡ କଟକଣା ଭିତରେ ପରିସ୍ଥିତି ଅନୁଧ୍ୟାନ କରି ନିଷ୍ପତି ନେବାକୁ ଆଜି ମୁଖ୍ୟ ଶାସନ ସଚିବ ଅସିତ ତ୍ରିପାଠୀ ରାଜ୍ୟର ସମସ୍ତ ଜିଲ୍ଲାପାଳମାନଙ୍କୁ ନିର୍ଦ୍ଦେଶ ଦେଇଛନ୍ତି । ଦଶଦିନ ମଧ୍ୟରେ ରାଜ୍ୟ ସରକାରଙ୍କୁ ଅବଗତ କରାଇବା ପାଇଁ ମୁଖ୍ୟ ଶାସନ ସଚିବ ତାଙ୍କ ଚିଠିରେ ଉଲ୍ଲେଖ କରିଛନ୍ତି ।
ସେପଟେ ଦେବୋତ୍ତର କମିଶନର ଚିତ୍ତରଞ୍ଜନ ମହାପାତ୍ର ସେବାୟତଙ୍କ ସପକ୍ଷରେ ବାହାରିଛନ୍ତି । ମନ୍ଦିର ଖୋଲିବାରେ ଅସୁବିଧା ନାହି ବୋଲି ସେ ସ୍ପଷ୍ଟ କରିଛନ୍ତି । କମିଶନର କହିଛନ୍ତି ଜିଲ୍ଲପାଳମାନେ ରିପୋର୍ଟ ଦେବାପରେ ମନ୍ଦିର ଖୋଲା ସମ୍ପର୍କରେ ବିଚାର କରାଯିବ । ଦେବୋତ୍ତର ଅଧୀନରେ ରାଜ୍ୟରେ ୧୮ହଜାର ମନ୍ଦିର ଅଛି । ସରକାର ଯେଉଁ କୋଭିଡ ଗାଇଡ ଲାଇନ କରିବେ, ପାଳନ କରାଯିବ । ସରକାରଙ୍କ ଚିଠି ପାଇନଥିବା କମିଶନର କହିଛନ୍ତି ।
