ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ମହିଳା ଟି-୨୦ ବିଶ୍ୱକପ୍ । ଆଜି ଭାରତ-ଅଷ୍ଟ୍ରେଲିଆ ସେମିଫାଇନାଲ । ଦକ୍ଷିଣ ଆଫ୍ରିକାରେ ଚାଲିଥିବା ମହିଳା ଟି-୨୦ ବିଶ୍ୱକପର ପ୍ରଥମ ସେମିଫାଇନାଲ୍ ଆଜି ଖେଳାଯିବ । କେପ୍ ଟାଉନରେ ହେବାକୁ ଥିବା ଏହି ମ୍ୟାଚରେ ମୁହାଁମୁହିଁ ହେବେ ଭାରତ ଓ ଅଷ୍ଟ୍ରେଲିଆ । ଉଭୟ ଦଳ ମଧ୍ୟରେ ଏକ ରୋମାଞ୍ଚକର ମ୍ୟାଚ୍ ଦେଖିବାକୁ ମିଳିପାରେ । ଯେଉଁଠି ଭାରତ ଏପର୍ଯ୍ୟନ୍ତ ବିଶ୍ୱକପରେ କେବଳ ଗୋଟିଏ ମ୍ୟାଚ୍ ଅର୍ଥାତ୍ ଇଂଲଣ୍ଡ ଠାରୁ ହାରିଛି । ଅନ୍ୟପକ୍ଷରେ ଅଷ୍ଟ୍ରେଲିଆର ବିଜୟ ରଥକୁ ବିଶ୍ୱକପରେ କୌଣସି ଦଳ ରୋକିପାରିନାହାନ୍ତି । ଅର୍ଥାତ୍ ଅଷ୍ଟ୍ରେଲିଆ ଗୋଟିଏ ବି ମୁକାବିଲା ହାରିନାହିଁ । ଏପରି ସ୍ଥିତିରେ ହରମନପ୍ରୀତ କୌରଙ୍କ ଟିମ୍ ଇଣ୍ଡିଆକୁ ବଡ଼ ଚ୍ୟାଲେଞ୍ଜର ସାମ୍ନା କରିବାକୁ ପଡ଼ିବ ।
ଲିଗ୍ ପର୍ଯ୍ୟାୟରେ ଭାରତ ପାଇଁ ବ୍ୟାଟିଂ ବିଭାଗ ଚିନ୍ତାର କାରଣ ହୋଇଛି । ସ୍ମୃତି ମନ୍ଧାନା ଫର୍ମରେ ଥିଲା ବେଳେ ଶେଫାଳୀଙ୍କ ବ୍ୟାଟରୁ ସେଭଳି ଚମକ ଦେଖିବାକୁ ମିଳୁନାହିଁ । ଅଧିନାୟକ ହରମନପ୍ରୀତ କୌର ମଧ୍ୟ ଲଗାତର ଫେଲ୍ ମାରୁଛନ୍ତି । ମିଡଲ ଅର୍ଡରରେ ରିଚା ଘୋଷଙ୍କୁ ଛାଡ଼ି ଦେଲେ ବାକି ସବୁ ବ୍ୟାଟର ଫ୍ଲପ୍ ହୋଇଛନ୍ତି । ଗତ ୫ ବର୍ଷ ହେବ ଭାରତ ବିଶ୍ୱର ଅନ୍ୟତମ ଶ୍ରେଷ୍ଠ ଦଳ ଭାବେ ନିଜର ଦକ୍ଷତା ପ୍ରମାଣିତ କରିଥିଲେ ମଧ୍ୟ କୌଣସି ବଡ଼ ଟ୍ରଫି ହାସଲ କରିପାରିନାହିଁ । ହରମନପ୍ରୀତ କୌରଙ୍କ ନେତୃତ୍ୱରେ ଭାରତ ଗ୍ରୁପ ପର୍ଯ୍ୟାୟରେ ୪ଟି ମ୍ୟାଚରୁ ୩ଟିରେ ବିଜୟୀ ହୋଇଛି । ଇଂଲଣ୍ଡ ବିପକ୍ଷରେ ଭାରତ ତାର ଏକମାତ୍ର ପରାଜୟ ବରଣ କରିଥିଲା ।
