ପ୍ରତିମା ଭୌମିକ ହୋଇପାରନ୍ତି ତ୍ରିପୁରା ପ୍ରଥମ ମହିଳା ମୁଖ୍ୟମନ୍ତ୍ରୀ

ଅଗରତାଲା (ବଡ଼ ଖବର ବ୍ୟୁରୋ):କେନ୍ଦ୍ରମନ୍ତ୍ରୀ ପ୍ରତିମା ଭୌମିକ ହୋଇପାରନ୍ତି ତ୍ରିପୁରାର ପ୍ରଥମ ମହିଳା ମୁଖ୍ୟମନ୍ତ୍ରୀ । କେନ୍ଦ୍ର ସାମାଜିକ ନ୍ୟାୟ ଓ ସଶକ୍ତୀକରଣ ରାଷ୍ଟ୍ରମନ୍ତ୍ରୀ ପ୍ରତିମା ଭୌମିକ ଧନପୁର ଆସନରୁ ଜିତିବା ପରେ ତ୍ରିପୁରାର ମୁଖ୍ୟମନ୍ତ୍ରୀ ଦୌଡ଼ରେ ଆଗରେ ଅଛନ୍ତି। ସେ ଯଦି ମୁଖ୍ୟମନ୍ତ୍ରୀ ହୁଅନ୍ତି ତେବେ ସେ ହେବେ ତ୍ରିପୁରାର ପ୍ରଥମ ମହିଳା ମୁଖ୍ୟମନ୍ତ୍ରୀ ହେବେ। ଶନିବାର ଭୌମିକ କହିଥିଲେ ଯେ ପରିଚୟ-ସଂକଟରେ ପୀଡ଼ିତ ଉତ୍ତରପୂର୍ବ ରାଜ୍ୟକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପରିଚୟ ପ୍ରଦାନ କରିଛନ୍ତି।

ମାର୍ଚ୍ଚ ୨ ତାରିଖରେ ପ୍ରକାଶିତ ତ୍ରିପୁରା ବିଧାନସଭା ନିର୍ବାଚନ ଫଳାଫଳ ଅନୁଯାୟୀ ବିଜେପି ୬୦ ଆସନରୁ ୩୨ଟି ଆସନରେ ଜିତି ପୂର୍ଣ୍ଣ ସଂଖ୍ୟାଗରିଷ୍ଠତା ହାସଲ କରିଛି। ଟିପ୍ରା ମୋଥା ପାର୍ଟି ୧୩ଟି ଆସନ ଜିତି ଦ୍ବିତୀୟ ସ୍ଥାନରେ ରହିଛି। ମାର୍କ୍ସବାଦୀ କମ୍ୟୁନିଷ୍ଟ ପାର୍ଟି ୧୧ଟି ଆସନ ଜିତିଥିବା ବେଳେ କଂଗ୍ରେସ ମାତ୍ର ୩ଟି ଆସନ ହାତେଇଛି। ଇଣ୍ଡିଜିନସ ପିପୁଲ୍‌ସ ଫ୍ରଣ୍ଟ ଅଫ୍ ତ୍ରିପୁରା (ଆଇପିଏଫ୍‌ଟି) ମାତ୍ର ଗୋଟିଏ ଆସନ ଜିତିଛି। ତେଣୁ ତ୍ରିପୁରାରେ ଦ୍ବିତୀୟ ଥର ପାଇଁ ବିଜେପି ସରକାର ଗଢ଼ିବାକୁ ଯାଉଥିବା ବେଳେ ମୁଖ୍ୟମନ୍ତ୍ରୀ ଦୌଡ଼ରେ ପ୍ରତିମା ଭୌମିକ ଆଗରେ ଥିବା ବିଶ୍ବସ୍ତ ସୂତ୍ରରୁ ଜଣାପଡ଼ିଛି।