ଇନ୍ଦୋର (ବଡ଼ ଖବର ବ୍ୟୁରୋ): ମଧ୍ୟପ୍ରଦେଶର ଇନ୍ଦୋରସ୍ଥିତ ବେଲେଶ୍ୱର ମହାଦେବ କୂଅ ଛାତ ଭୁଶୁଡ଼ିବା ଘଟଣା । ବାମ୍ଫିକୂଅରେ ପଡ଼ି ୨୧ଜଣ ମହିଳା ଓ ଦୁଇଜଣ ଶିଶୁଙ୍କ ସମେତ ୩୬ଜଣ ଶ୍ରଦ୍ଧାଳୁଙ୍କ ମୃତ୍ୟୁ ହୋଇଥିଲା। ଯାହାକୁ ନେଇ ପ୍ରଶାସନ ପଶିଛି ଚେତା । ବେଆଇନ ମନ୍ଦିର ନିର୍ମାଣକୁ ଭାଙ୍ଗିବା ପାଇଁ ଘଟଣାସ୍ଥଳରେ ନଗରନିଗମ ଓ ପୁଲିସ ଦଳ ସୋମବାର ପହଞ୍ଚିଛନ୍ତି। ମନ୍ଦିରରେ ବେଆଇନ ନିର୍ମାଣକୁ ଭାଙ୍ଗିବା ପାଇଁ ପାଞ୍ଚରୁ ଅଧିକ ପୋକଲେନ ଓ ଜେସିବିର ସାହାଯ୍ୟ ନିଆଯାଇଛି।
ତେବେ ଏହି ଉଚ୍ଛେଦ କାମ ବେଳେ କୌଣସି ଗଣ୍ଡଗୋଳ ଯେମିତି ନଉପୁଜେ ସେଥିପାଇଁ ୪ଟି ଥାନାର ପୁଲିସ ଫୋର୍ସକୁ ନିୟୋଜିତ କରାଯାଇଛି। ଇନ୍ଦୋର ନଗର ନିଗମର ଅତିରିକ୍ତ ସଚିବ କହିଛନ୍ତି, ‘ଲୋକଙ୍କ ସୁରକ୍ଷା ଦୃଷ୍ଟିରୁ ନଗର ନିଗମ ପକ୍ଷରୁ ମନ୍ଦିରର ଅବୈଧ ନିର୍ମାଣକୁ ଭାଙ୍ଗାଯାଇଛି । ଯେଉଁ ଭାଗ ଭଙ୍ଗାଯାଇଛି, ତାହା ବିନା ଅନୁମତିରେ ନିର୍ମାଣ କରାଯାଇଥିଲା । ଭବିଷ୍ୟତରେ ଏହାକୁ ନେଇ ବିପଦ ରହିଥିବାରୁ ନଗର ନିଗମ ପକ୍ଷରୁ ଏହି କାର୍ଯ୍ୟାନୁଷ୍ଠାନ ନିଆଯାଇଛି ।
