ସ୍ୱର୍ଣ୍ଣ ଜିତିଲେ ଶର୍ମିଳା
ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ଇତିହାସ ରଚିଲେ ଭାରତୀୟ ଝିଅ ଶର୍ମିଳା । ସ୍କଟଲ୍ୟାଣ୍ଡର ଗ୍ଲାସଗୋରେ ଚାଲିଥିବା ୨୦୨୬ କମନୱେଲଥ୍ ଗେମ୍ସରେ ସୁନା ଜିତିଲେ ଭାରତୀୟ ଝିଅ ଶର୍ମିଳା ଧନଖର । ପାରା ସଟପୁଟରେ ସ୍ୱର୍ଣ୍ଣ ପଦକ ଜିତି ଦେଶର ଗୌରବ ବଢ଼ାଇଛନ୍ତି । ମହିଳା ସଟ୍ପୁଟ୍ (ଏଫ୍୫୭) ଶର୍ମିଳା ପ୍ରଥମ ପ୍ରୟାସରେ ୯.୪୮ ମିଟର ଫିଙ୍ଗିଥିଲେ । ପରେ ତୃତୀୟ ପ୍ରୟାସରେ ୯.୮୧ ମିଟର ଫିଙ୍ଗି ସ୍ୱର୍ଣ୍ଣ ପକ୍କା କରିଥିଲେ । ଘାନାର ଜିନାବୁ ଇସା (୮.୬୫ ମିଟର) ରୌପ୍ୟ ଏବଂ ଶିଳ୍ପା କେ. ଶ୍ୟାଲା (୭.୨୬ ମିଟର) ବ୍ରୋଞ୍ଜ ଜିତିଥିଲେ । ସ୍ୱର୍ଣ୍ଣ ପଦକ ଜିତିବା ପରେ ଶର୍ମିଳା କହିଛନ୍ତି, “ଦେଶ ପାଇଁ ପଦକ ଜିତି ମୁଁ ବହୁତ ଖୁସି ଏବଂ ଗର୍ବିତ । ଭବିଷ୍ୟତରେ ମଧ୍ୟ ଏଭଳି ଭାବେ ଦେଶ ପାଇଁ ସମ୍ମାନ ଆଣିବାକୁ ଚେଷ୍ଟା କରିବି । ଏହି ଐତିହାସିକ ସଫଳତା ପରେ ସେ ନିଜର ଖୁସି ବ୍ୟକ୍ତ କରିବା ସହ ଏହି ପଦକକୁ ନିଜ ମା’ଙ୍କୁ ଉତ୍ସର୍ଗ କରିଛନ୍ତି । ହରିୟାଣାର ମହେନ୍ଦ୍ରଗଡ଼ ଜିଲ୍ଲାର ଚିତ୍ରୌଲି ଗାଁର ବାସିନ୍ଦା ଶର୍ମିଲା ଧନଖର ପ୍ରଥମରୁ ହିଁ କଷ୍ଟକର ପରିସ୍ଥିତିର ସମ୍ମୁଖୀନ ହୋଇଥିଲେ ।
ଦୁଇ ବର୍ଷ ବୟସରେ ସେ ପୋଲିଓରେ ପକ୍ଷାଘାତର ଶିକାର ହୋଇଥିଲେ । ଯାହା ଫଳରେ ତାଙ୍କର ଗୋଟିଏ ଗୋଡ଼ ପକ୍ଷାଘାତଗ୍ରସ୍ତ ହୋଇଯାଇଥିଲା । ତାଙ୍କ ବାପା ଜଣେ କ୍ଷୁଦ୍ର ଚାଷୀ, ଉପଯୁକ୍ତ ଚିକିତ୍ସା ଖର୍ଚ୍ଚ ବହନ କରିପାରି ନ ଥିଲେ ଏବଂ ତାଙ୍କ ମା’ ମଧ୍ୟ ତାଙ୍କର ଯତ୍ନ ନେବାକୁ ଅସମର୍ଥ ଥିଲେ । ତଥାପି ଏହି ପରିସ୍ଥିତିରେ ସେ ହାର ମାନି ନ ଥିଲେ । ୩୪ବର୍ଷ ବୟସରେ ସେ ନିଜ ସଫଳତାକୁ ହାତେଇ ପାରିଛନ୍ତି । ଆଗାମି ଦିନରେ ଅନେକ ପଦକ ଜିତି ଭାରତର ନାଁକୁ ବିଶ୍ୱ ଦରବାରରେ ଆହୁରି ଗୌରବାନ୍ୱିତ କରିବାକୁ ସେ ଲକ୍ଷ୍ୟ ରଖିଥିବା କହିଛନ୍ତି ଶର୍ମିଳା । କମନୱେଲଥ୍ ଗେମ୍ସରେ ଏହା ତାଙ୍କର ପ୍ରଥମ ପଦକ ହୋଇଥିଲେ ମଧ୍ୟ, ଏସୀୟ କ୍ରୀଡ଼ା ଓ ଅଲିମ୍ପିକ୍ସ ଏବେ ତାଙ୍କର ପରବର୍ତ୍ତୀ ଲକ୍ଷ୍ୟ ହେବ ବୋଲି ସେ କହିଛନ୍ତି ।