ଆଜିଠୁ ଏକକ ପିଜି ପରୀକ୍ଷା

ଭୁବନେଶ୍ୱର (ବଡ଼ ଖବର ବ୍ୟୁରୋ): ରାଜ୍ୟ ଉଚ୍ଚଶିକ୍ଷା ବିଭାଗ ପକ୍ଷରୁ ପ୍ରଥମଥର ସ୍ନାତକୋତ୍ତର (ପିଜି) ପାଠ୍ୟକ୍ରମ ପାଇଁ ଏକକ ପ୍ରବେଶିକା ପରୀକ୍ଷା ଆଜିଠାରୁ ଆରମ୍ଭ ହେଉଛି । ରାଜ୍ୟର ସସସ୍ତ ସରକାରୀ ବିଶ୍ୱବିଦ୍ୟାଳୟ ଓ ସ୍ୱୟଂଶାସିତ ମହାବିଦ୍ୟାଳୟରେ ନାମଲେଖା ପାଇଁ ଏହି ପ୍ରବେଶିକା ପରୀକ୍ଷା ହେବ । ଆଜିଠୁ ଆସନ୍ତା ୨୨ ତାରିଖ ଯାଏଁ ୬୮ଟି ଶିକ୍ଷାନୁଷ୍ଠାନରେ ଏହି ପ୍ରବେଶିକା ପରୀକ୍ଷା ଅନୁଷ୍ଠିତ ହେବ । ପ୍ରତିଦିନ ୩ଟି ସିଟିଙ୍ଗରେ ପରୀକ୍ଷା କରାଯିବ ।
୬୨ ହଜାର ୧୮୯ ଛାତ୍ରଛାତ୍ରୀ ଏହି ଏକକ ପିଜି ନାମଲେଖା ପାଇଁ ଆବେଦନ କରିଛନ୍ତି । ୮୩ଟି ପିଜି ବିଷୟରେ ୧୪ ହଜାର ୭ଶହ ସିଟ୍ ପାଇଁ ନାମଲେଖା ହେବ । ପ୍ରତ୍ୟେକ ପରୀକ୍ଷା ପାଇଁ ୯୦ ମିନିଟ ସମୟ ଧାର୍ଯ୍ୟ କରାଯାଇଛି । ଓଏମଆର ସିଟରେ ୭୦ଟି ମଲ୍ଟିପୁଲ ଚଏସ୍ ପ୍ରଶ୍ନ ରହିବ । ଏହାସହ କରୋନା ମହାମାରୀକୁ ଦୃଷ୍ଟିରେ ରଖି ପ୍ରତି ସିଟିଙ୍ଗ୍ ପରେ ପରୀକ୍ଷାକେନ୍ଦ୍ରକୁ ବିଶୋଧନ କରାଯିବା ସହ ପରୀକ୍ଷାର୍ଥୀଙ୍କ ଥର୍ମାଲ ସ୍କ୍ରିନିଂ କରାଯିବ ବୋଲି ସୂଚନା ଦେଇଛନ୍ତି ପିଜି କାଉସିଲ୍ ଅଧ୍ୟକ୍ଷ ପ୍ରଫେସର ବସନ୍ତ ମଲ୍ଲିକ ।