ଅନିଚ୍ଛା ସତ୍ତ୍ୱେ ହେଉଥିଲା ବିବାହ, ହାତଗଣ୍ଠି ପଡ଼ିବା ପୂର୍ବରୁ ଥାନାରେ ପହଞ୍ଚିଲା କନ୍ୟା

କୋରେଇ (ବଡ଼ ଖବର ବ୍ୟୁରୋ): ନାବଳିକାର ଅନିଚ୍ଛା ସତ୍ତ୍ୱେ ହେଉଥିଲା ବିବାହ । ହାତଗଣ୍ଠି ପଡ଼ିବା ପୂର୍ବରୁ ଥାନାରେ ପହଞ୍ଚିଲା ନାବାଳିକା । ପୋଲିସ ଅଟକାଇଲା ବାଲ୍ୟବିବାହ । ଏଭଳି ଦୃଶ୍ୟ ଦେଖିବାକୁ ମିଳିଛି ପାଣିକୋଇଲି ଥାନା ପଥରପଦା ପଞ୍ଚାୟତ ବେଙ୍ଗାସାହିରେ । ଯାହା ଚର୍ଚ୍ଚାର ବିଷୟ ପାଲଟିଛି । ପଥରପଦା ପଞ୍ଚାୟତ ବେଙ୍ଗାସାହିରେ ରହିଆସୁଥିବା କେନ୍ଦୁଝର ଜିଲ୍ଲା ଆନନ୍ଦପୁରର ରତ୍ନାକର ମହାରଣାଙ୍କ ପୁଅ ପିଙ୍କୁନ ମହାରଣାଙ୍କ ସହ ବେଙ୍ଗାସାହିର ମକରଧ୍ୱଜ ନାୟକଙ୍କ ନାବାଳିକା ଝିଅଙ୍କ ବାରଣ ସତ୍ତ୍ବେ ତାଙ୍କ ସହ ବିବାହ ଆୟୋଜନ କରାଯାଇଥିଲା ।

ତେବେ ବିବାହ ପାଇଁ ପ୍ରସ୍ତୁତି ଚାଲିଥିବାବେଳେ ନାବାଳିକା ଜଣଙ୍କ କୌଣସି ମତେ ସେଠାରୁ ଚାଲିଆସି ପାଣିକୋଇଲି ଥାନାରେ ଘଟଣା ସମ୍ପର୍କରେ ଜଣାଇଥିଲେ । ଏନେଇ ପାଣିକୋଇଲି ପୁଲିସ ଘଟଣାସ୍ଥଳକୁ ଯାଇ ନାବାଳିକାଙ୍କୁ ଉଦ୍ଧାର କରିଥିଲେ । ବେଙ୍ଗାସାହି ଯାଇ ବାଲ୍ୟବିବାହରେ ସମ୍ପୃକ୍ତ ଥିବା ଉଭୟ ପକ୍ଷକୁ ପାଣିକୋଇଲି ଥାନାକୁ ଆଣିଥିଲେ । ପରେ ବୁଝାସୁଝା କରି ଛାଡିଦେଇଥିଲେ ।