ଇମ୍ଫାଲ (ବଡ଼ ଖବର ବ୍ୟୁରୋ): ହିଂସାରେ ଜଳୁଛି ମଣିପୁର । ହିଂସାକୁ ଗୋଟାଏ ମାସରୁ ଅଧିକ ବିତିଲାଣି । ତଥାପି ମେତେଇ ଓ କୁକି ସମୁଦାୟ ମଧ୍ୟରେ ବଡ଼ ଧରଣ ହିଂସା ନହେଲେ ମଧ୍ୟ ଛୋଟ ଛୋଟ ହିଂସା ଦେଖିବାକୁ ମିଳିଛି । ଏହି ହିଂସା କାରଣରୁ ମଣିପୁରରେ ଏବେ ଅତ୍ୟାବଶକୀୟ ସାମଗ୍ରୀର ଦାମ ଆକାଶଛୁଆଁ ହୋଇଛି । ପେଟ୍ରୋଲ ଟାଙ୍କିକୁ ପେଟ୍ରୋଲ ଯୋଗାଣ ହୋଇପାରୁନଥିବାରୁ କଳାବଜାରୀମାନେ ଲିଟର ପ୍ରତି ୨୦୦ଟଙ୍କାରୁ ଅଧିକ ଦାମରେ ବିକ୍ରି କରୁଛନ୍ତି । ସେପଟେ ଏଟିଏମରୁ ନଗଦ ଟଙ୍କା ସରିଯାଇଥିବା ଜଣାପଡ଼ିଛି ।
ଖାଲି ସେତିକି ନୁହେଁ ଔଷଧର ଅଭାବ ପଡିଛି । ଫଳରେ ଔଷଧ ଦୋକାନଗୁଡିକ ଦିନରେ କିଛି ଘଣ୍ଟାମାତ୍ର ଦୋକାନ ଖୋଲିବା ପରେ ବନ୍ଦ କରିଦେଉଛନ୍ତି । ମଣିପୁରରେ ଲାଗି ରହିଥିବା ହିଂସା କାରଣରୁ ଏପର୍ୟ୍ୟନ୍ତ ଶହ ଶହ ଲୋକ ନିଜ ବାସସ୍ଥାନ ହରାଇଛନ୍ତି । ଅନ୍ୟପଟେ ବଡ ଧରଣର ହିଂସାକୁ ରୋକିବାରେ ପ୍ରଶାସନ ସଫଳ ହୋଇଥିବା ବେଳେ ଏବେ ବି ଛୋଟ ଛୋଟ ହିଂସା ଦେଖିବାକୁ ମିଳିଛି । ଫଳରେ ବାହାର ରାଜ୍ୟରୁ ଆମଦାନୀ ହେଉଥିବା ଖାଦ୍ୟ ସାମଗ୍ରୀ ଠିକ୍ ଭାବେ ମଣିପୁରରେ ପହଂଚିପାରୁ ନାହିଁ ।
