ପୁରୀ (ବଡ଼ ଖବର ବ୍ୟୁରୋ): ସୁରକ୍ଷା ଗଡ଼ ପାଲଟିଛି ଶ୍ରୀକ୍ଷେତ୍ର ପୁରୀ। ଜଳ, ସ୍ଥଳ ଆକାଶ ସବୁଠି ମୁତୟନ ହୋଇଛନ୍ତି ସୁରକ୍ଷାକର୍ମୀ। ବଙ୍ଗୋପସାଗରରେ ତଟ ସୁରକ୍ଷା ବାହିନୀ ଚକ୍କର କାଟୁଛନ୍ତି। ଶତ୍ରୁକୁ କଡ଼ା ଜବାବ ଦେବା ପାଇଁ ରଖିଛନ୍ତି ଅତ୍ୟାଧୁନିକ ଅସ୍ତ୍ରଶସ୍ତ୍ର। ଆକାଶରେ ଡ୍ରୋନର ସାହାରା ନିଆଯାଇଛି। ଆକାଶ ମାର୍ଗରୁ ଅସାମାଜିକ ଲୋକଙ୍କ ଉପରେ ତୀକ୍ଷ୍ଣ ନଜର ରଖିଛି ଡ୍ରୋନ୍। ପୁରୀ ସହର ସମେତ ୫ କିଲୋମିଟର ସଂଲଗ୍ନ ଅଞ୍ଚଳକୁ ଘେରି ରହିଛି ପୋଲିସ। ୧୮୭ ପ୍ଲାଟୁନ୍ ଯବାନ ବିଭିନ୍ନ ସ୍ଥାନରେ ମୁତୟନ ହୋଇଛନ୍ତି।
୧ ହଜାରରୁ ଅଧିକ ପୋଲିସ ଅଫିସରଙ୍କ ନେତୃତ୍ଵରେ ସୁରକ୍ଷା ବାହିନୀ କାର୍ୟ୍ୟ କରୁଛନ୍ତି। ରଥଯାତ୍ରାକୁ ଶାନ୍ତିଶୃଙ୍ଖଳାର ସହ ଶେଷ କରିବାକୁ ପୁରୀରେ ଡେରା ପକାଇଛନ୍ତି, ପୋଲିସ ଡିଜି, ଗୃହ ବିଭାଗର ପ୍ରମୁଖ ଶାସନ ସଚିବଙ୍କ ସମେତ ବହୁ ବରିଷ୍ଠ ପୋଲିସ ଓ ପ୍ରଶାସନିକ ଅଧିକାରୀ। ରଥଯାତ୍ରାରେ ସ୍ଵେଚ୍ଛାସେବୀ ଓ ଅଗ୍ନିଶମ ବାହିନୀଙ୍କ ଭୂମିକା ଅତି ଗୁରୁତ୍ଵପୂଣ୍ଣ।
