ସତ୍ୟବାଦୀ, (ବଡ଼ ଖବର ବ୍ୟୁରୋ): ପୁରୀ ଜିଲ୍ଲା ସତ୍ୟବାଦୀ ବ୍ଲକ ଦାସବିଦ୍ୟାଧରପୁର ପଞ୍ଚାୟତର ବିଜେପି ସମର୍ଥିତ ସରପଞ୍ଚ ହରିହର ନନ୍ଦଙ୍କୁ ହୋଇଛି ମରଣାନ୍ତକ ଆକ୍ରମଣ । ଗତକାଲି ସନ୍ଧ୍ୟାରେ ନନ୍ଦ ଗାଁ ନିକଟ ଏକ ପାନ ଦୋକାନରେ ବସିଥିବାବେଳେ ଉକ୍ତ ପଞ୍ଚାୟତ ଭୀମପୁର ଗ୍ରାମର ରବୀନ୍ଦ୍ର ରଥ ଏବଂ ତାଙ୍କର କେତେଜଣ ସମର୍ଥକ ମାରଣାସ୍ତ୍ରରେ ଅତର୍କିତ ଆକ୍ରମଣ କରିଥିଲେ । ନନ୍ଦଙ୍କ ମୁଣ୍ଡ, ହାତ ସମେତ ଶରୀରର ବିଭିନ୍ନ ସ୍ଥାନରେ ଗଭୀର ଆଘାତ ଲାଗିଛିା । ତାଙ୍କୁ ସାକ୍ଷୀଗୋପାଳ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ପ୍ରାଥମିକ ଚିକିତ୍ସା ପରେ ଭୁବନେଶ୍ୱର ସ୍ଥାନାନ୍ତର କରାଯାଇଥିଲା । ଏବେ ତାଙ୍କ ଅବସ୍ଥା ସଙ୍କଟାପନ୍ନ ରହିଛି । ତେବେ ଘଟଣାକୁ ଇତିମଧ୍ୟରେ ଗୋଟିଏ ଦିନ ବିତିଥିଲେ ମଧ୍ୟ ପୋଲିସ ଅଭିଯୁକ୍ତଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରି ନ ଥିବାରୁ ଅଞ୍ଚଳରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି । ରାଜନୈତିକ ଶତ୍ରୁତାରୁ ସରପଙ୍କୁ ଆକ୍ରମଣ କରାଯାଇଥିବା କୁହାଯାଉଥିବାବେଳେ ଶାସକ ଦଳର କର୍ମୀଙ୍କ ହାତ ଥିବା ସରପଞ୍ଚ ନନ୍ଦ ଅଭିଯୋଗ କରିଛନ୍ତି ।
ସେହିପରି ସ୍ଥାନୀୟ ବିଜେଡି ବିଧାୟକଙ୍କ ଇସାରାରେ ଏପରି କରାଯାଇଥିବା ବିଜେପି ନେତା ଓମପ୍ରକାଶ ମିଶ୍ର କହିଛନ୍ତି । ଏହି କାରଣରୁ ପୋଲିସ ଅଭିଯୁକ୍ତଙ୍କ ଦେହରେ ହାତ ମାରିବାକୁ ସାହସ କରୁନି ବୋଲି ଅଭିଯୋଗ କରିଛନ୍ତି ମିଶ୍ର । ସତ୍ୟବାଦୀ ଥାନା ପୋଲିସର ନିଷ୍କ୍ରିୟତା ପ୍ରତିବାଦରେ ଆଜି ଥାନା ଘେରାଉ କରିଛି ସତ୍ୟବାଦୀ ବିଜେପି । ଓମପ୍ରକାଶ ମିଶ୍ରଙ୍କ ନେତୃତ୍ୱରେ ଶତାଧିକ କର୍ମୀ ତଥା କର୍ମକର୍ତ୍ତା ଆଜି ପୂର୍ବାହ୍ନରୁ ଥାନା ଘେରାଉ କରିବା ସହ ନାରାବାଜି କରିଛନ୍ତି । ଅଭିଯୁକ୍ତମାନେ ଶାସକ ଦଳର ହୋଇଥିବାରୁ ପୋଲିସ ସେମାନଙ୍କୁ ଗିରଫ କରିବା ପରିବର୍ତ୍ତେ ସୁରକ୍ଷା ଦେଉଥିବା ସେମାନେ ଅଭିଯୋଗ କରିଛନ୍ତି । ପୋଲିସର ଉଚ୍ଚ ଅଧିକାରୀ ଆସି କାର୍ଯ୍ୟାନୁଷ୍ଠାନ ଗ୍ରହଣ ନ କରିବା ପର୍ଯ୍ୟନ୍ତ ଆନ୍ଦୋଳନ ଜାରି ରହିବ ବୋଲି ମିଶ୍ର କହିଛନ୍ତି । ଏବେ ବି ଆନ୍ଦୋଳନ ଜାରି ରହିଛି ।
