ଆଜି ବସିବ ଛତିଶାନିଯୋଗର ଗୁରୁତ୍ୱପୂର୍ଣ୍ଣ ବୈଠକ

ପୁରୀ (ବଡ଼ ଖବର ଵ୍ୟୁରୋ): ଆଜି ହେବ ଛତିଶାନିଯୋଗର ଗୁରତ୍ୱପୂର୍ଣ୍ଣ ବୈଠକ। ସଂଧ୍ୟା ୫ଟାରେ ନୀଳାଦ୍ରିଭକ୍ତନିବାସରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ରଞ୍ଜନ ଦାସଙ୍କ ଅଧକ୍ଷତାରେ ଅନୁଷ୍ଠିତ ହେବ ଛତିଶାନିଯୋଗ ବୈଠକ । ବୈଠକରେ ପୁରୀ ଜିଲ୍ଲାପାଳ, ତଥା ଶ୍ରୀମନ୍ଦିର ଉପମୁଖ୍ୟ ପ୍ରଶାସକ,ଏସପି, ସମସ୍ତ ନିଯୋଗର ସେବାୟତ ପ୍ରତିନିଧି, ପରିଚାଳନା କମିଟିର ସମସ୍ତ ସେବାୟତ ଓ ଶ୍ରୀମନ୍ଦିର ପ୍ରଶାସନିକ ଅଧିକାରୀ ମାନେ ଉପସ୍ଥିତ ରହିବେ। ବୈଠକରେ ଚାରିଦୁଆର ଖୋଲିବା ମୁଖ୍ୟ ପ୍ରସଙ୍ଗ ହେବ ବୋଲି ସୂଚନା ମିଳିଛି। ତେବେ କେବଳ କଣ ପୁରୀବାସୀଙ୍କ ପାଇଁ ସମସ୍ତ ଦ୍ୱାର ଖୋଲାଯିବ ନା ସମସ୍ତ ଜଗନ୍ନାଥ ପ୍ରେମୀ ଭକ୍ତଙ୍କ ପାଇଁ ଚାରି ଦୁଆର ଖୋଲାଯିବ ସେନେଇ ନିଷ୍କର୍ସ ବାହାରିପାରେ। ସେପଟେ ଶ୍ରୀମନ୍ଦିର ପ୍ରଶାସନ ଓ ଦତ୍ତମହାପାତ୍ର ସେବକଙ୍କ ମଧ୍ୟରେ ସମନ୍ୱୟ ଅଭାବ ଯୋଗୁଁ ମହାପ୍ରଭୁଙ୍କ ଶ୍ରୀମୁଖ ଶୃଙ୍ଗାର ପାଇଁ ବନକଲାଗି ନୀତି ହୋଇପାରୁନଥିବାରୁ ବୈଠକରେ ଏହା ଉପରେ ମଧ୍ୟ ଆଲୋଚନା ହୋଇପାରେ। ଅନ୍ୟପଟେ ରଥଯାତ୍ରାରେ ହୋଇଥିବା ବିଶୃଙ୍ଖଳା ଉପରେ ସମୀକ୍ଷା କରାଯିବା ସହ ଆଗକୁ ହାଇକୋର୍ଟ ରତ୍ନଭଣ୍ଡାର ପ୍ରସଙ୍ଗରେ ଶୁଣାଣି କରିବାକୁ ଥିବାରୁ ରତ୍ନଭଣ୍ଡାର ମରାମତି ଓ ଖୋଲିବା ଉପରେ ମଧ୍ୟ ଆଲୋଚନା ହୋଇପାରେ।