ପଶ୍ଚିମବଙ୍ଗ ପାଞ୍ଚଲାରେ ଜଣେ ମହିଳାଙ୍କୁ ଉଲଗ୍ନ କଲେ, ଗାଁରେ ଚଲାଇଲେ

କୋଲକାତା (ବଡ଼ ଖବର ବ୍ୟୁରୋ): ମଣିପୁର ପରେ ଏବେ ପଶ୍ଚିମବଙ୍ଗରେ ଲଜ୍ଜା । ମଣିପୁର ଲଜ୍ଜା ଦେଶକୁ ବିଚଳିତ ବିବ୍ରତ କରିଥିବାବେଳେ ଏବେ ପଶ୍ଚିମବଙ୍ଗରେ ସମାନ ଜିନିଷ ଦେଖିବାକୁ ମିଳିଛି । ଏଯାଏଁ ମଣିପୁରର ଛାତିଥରା ଦୃଶ୍ୟ ମନରୁ ଲିଭିନଥିବାବେଳେ ପଶ୍ଚିମବଙ୍ଗର ହାୱଡାର ପାଞ୍ଚଲାରେ ଜଣେ ମହିଳାଙ୍କୁ ଉଲଗ୍ନ କରି ଚଳାଇଛନ୍ତି ।

ପୀଡିତା ଜଣକ ହେଉଛନ୍ତି ପଶ୍ଚିମବଙ୍ଗର ଏକ ଗ୍ରାମ ପଞ୍ଚାୟତର ଜଣେ ମହିଳା ପ୍ରାର୍ଥୀ। ମହିଳା ଜଣକ କ୍ଷମତାସୀନ ତୃଣମୂଳ କଂଗ୍ରେସର କାର୍ଯ୍ୟକର୍ତ୍ତାଙ୍କ ଉପରେ ଅଭିଯୋଗ ଆଣିଛନ୍ତି। କର୍ମକର୍ତ୍ତାମାନେ ତାଙ୍କୁ ଶାରୀରିକ ନିର୍ୟାତନା ଦେବା ସହ ଦୁର୍ବବ୍ୟବହାର କରିଥିବା ସେ ଅଭିଯୋଗ କରିଛନ୍ତି। ଘଟଣାଟି ରାଜ୍ୟରେ ପଞ୍ଚାୟତ ନିର୍ବାଚନ ହିଂସା ବେଳର । ସେ କହିଛନ୍ତି ଯେ ତୃଣମୂଳ କର୍ମକର୍ତ୍ତାମାନେ ତାଙ୍କୁ ଉଲଗ୍ନ କରି ପୁରା ଗାଁରେ ଚଲାଇଥିଲେ ।

ପୀଡିତାଙ୍କ ଅଭିଯୋଗରେ ପାଞ୍ଚଲା ପୋଲିସ ଏକ ମାମଲା ରୁଜୁ କରିଛି । ମହିଳା ଜଣକ ତାଙ୍କ ଅଭିଯୋଗରେ କହିଛନ୍ତି ଯେ, ତାଙ୍କୁ ପ୍ରାୟ ୪୦-୫୦ ତୃଣମୂଳ ଉପଦ୍ରବକାରୀମାନେ ମାରପିଟ୍‌ କରିଛନ୍ତି। ପୀଡିତା ଏଫ୍‌ଆଇଆର୍‌ କପିରେ ତୃଣମୂଳ ପ୍ରାର୍ଥୀ ହେମନ୍ତ ରାୟ, ନୁର ଆଲାମ, ଅଲଫି ଏସ.କେ, ରଣବୀର ପଞ୍ଜା ସଞ୍ଜୁ, ସୁକମଲ ପଞ୍ଜାଙ୍କ ସମେତ ଅନେକ ଲୋକଙ୍କ ନାମରେ ଅଭିଯୋଗ କରିଛନ୍ତି।