୪୩ ଲକ୍ଷ ଟଙ୍କାର ନକଲି ଜିନ୍ସ ଜବତ

ବଲାଙ୍ଗୀର (ବଡ଼ ଖବର ବ୍ୟୁରୋ): ଧରାପଡ଼ିଲା ବେଆଇନ କପଡା ବ୍ୟବସାୟ । ୪୩ ଲକ୍ଷ ଟଙ୍କାର ନକଲି ଜିନ୍ସ୍ ଜବତ ସହ ମାଲିକକୁ ଜେଲ ପଠାଇଛି ପୋଲିସ । ଗିରଫ ଅଭିଯୁକ୍ତ ଜଣଙ୍କ ହେଲେ ନ୍ୟୁ ଲଖାନି କପଡା ହୋଲସେଲ ଓ ଖୁଚୁରା ଦୋକାନର ମାଲିକ ରାଜେଶ କୁମାର ଲଖାନି । ଲେଭିଶ, କେଲଭିନ କ୍ଲିନ୍ ଓ ଅଣ୍ଡର ଆର୍ମର ଭଳି ନାମୀଦାମୀ କମ୍ପାନୀର ନକଲି ଜିନ୍ସ ଏଠାରେ ବିକ୍ରି ଚାଲିଥିଲା । ଦୀର୍ଘ ବର୍ଷ ହେଲା କୋଟି କୋଟି ଟଙ୍କାର ବ୍ୟବସାୟ ପରେ ଏବେ ଲଖାନି ଗାରମେଣ୍ଟସ ମାଲିକର ଅସଲ ମୁଖା ଖୋଲିଛି । ରାୟପୁରରୁ ଶସ୍ତା କପଡା କିଣି ସେଥିରେ ବିଭିନ୍ନ ନାମୀଦାମୀ କମ୍ପାନୀର ଲୋଗୋ ଓ ଷ୍ଟିକର ଲଗାଇ ଚଢା ଦରରେ ବିକ୍ରି ଚାଲିଥିଲା। ବଲାଙ୍ଗିର ସୁଦପଡା ସ୍ଥିତ ଲେଖାନି ନ୍ୟୁ ଗାର୍ମେଣ୍ଟ କପଡା ଟ୍ରେଡିଂ ଉପରେ ଚଢ଼ାଉ କରି ୪୩ ଲକ୍ଷ ଟଙ୍କାର ଜିନ୍ସ ଜବତ କରାଯାଇଛି । ବେଆଇନ କାରବାର ନେଇ ମୁମ୍ବାଇର ଲେବିଶ ନେଟ୍ରିକା କଂସଲଟିଙ୍ଗ ପ୍ରାଇଭେଟ କମ୍ପାନୀ ପକ୍ଷରୁ ଦୀପକ କୁମାର ଗୁପ୍ତା ଟାଉନଥାନାରେ ଅଭିଯୋଗ କରିଥିଲେ। ବଲାଙ୍ଗୀର ଏସପିଙ୍କ ନିର୍ଦ୍ଦେଶରେ ଏକ ଟିମ ଗଠନ କରି ସମ୍ପୃକ୍ତ ଦୋକାନ ଉପରେ ଚଢ଼ାଉ କରାଯାଇଥିଲା।