ସ୍ୱର୍ଗଦ୍ୱାରରେ କଟକଣା ଉଠିଲା

ପୁରୀ, (ବଡ଼ ଖବର ବ୍ୟୁରୋ): ଦୀର୍ଘଦିନ ପରେ ସମସ୍ତଙ୍କ ପାଇଁ ପୁଣି ଥରେ ଖୋଲିଛି ସ୍ୱର୍ଗଦ୍ୱାର । କରୋନା କଟକଣା ପାଇଁ ପୁରୀ ଜିଲ୍ଲା ପ୍ରଶାସନ ତରଫରୁ ସ୍ୱର୍ଗଦ୍ୱାରକୁ ସର୍ବସାଧାରଣ ପାଇଁ ବନ୍ଦ ରଖାଯାଇଥିଲା । କେବଳ ପୁରୀବାସୀ ହିଁ ସ୍ୱର୍ଗଦ୍ୱାରରେ ଶବଦାହ କରିପାରିବେ ବୋଲି ନିଷ୍ପତ୍ତି ନେଇଥିଲେ ଜିଲ୍ଲାପାଳ । ବର୍ତ୍ତମାନ ପୂର୍ବପରି ସର୍ବସାଧାରଣ ମଧ୍ୟ ଆସି ଶବଦାହ କରିପାରିବେ ବୋଲି ସୂଚନା ଦେଇଛନ୍ତି ପୁରୀ ଜିଲ୍ଲାପାଳ ବଲୱନ୍ତ ସିଂ । ସେ କହିଛନ୍ତି ଜିଲ୍ଲାରେ ସଂକ୍ରମଣ ହାର କମିଥିବାରୁ ସ୍ୱର୍ଗଦ୍ୱାରରୁ କଟକଣା ହଟାଯାଇଛି । ଶବଦାହ କରିବା ସମୟରେ କୋଭିଡ୍ ଗାଇଡଲାଇନ ମାନିବାକୁ ପଡ଼ିବ । ତେବେ ଶବ ସତ୍କାର ବେଳେ ୨୦ରୁ ଅଧିକ ଲୋକ ଉପସ୍ଥିତ ରହିବେ ନାହିଁ । ଉପସ୍ଥିତ ସମସ୍ତ ବ୍ୟକ୍ତି ମାସ୍କ ପିନ୍ଧିବା ଜରୁରୀ ବୋଲି ଜିଲ୍ଲାପାଳ ସିଂ କହିଛନ୍ତି।