୧୨.୫ କିଲୋ ସୁନା-ରୂପାରେ ତିଆରି ହୋଇଛି ଶ୍ରୀରାମଙ୍କ ଚରଣ ପାଦୁକା
ଉତ୍ତରପ୍ରଦେଶ (ବଡ଼ ଖବର ବ୍ୟୁରୋ): ଅଯୋଧ୍ୟାରେ ଭଗବାନ ଶ୍ରୀରାମଙ୍କ ପ୍ରାଣ ପ୍ରତିଷ୍ଠା ଉତ୍ସବକୁ ଏବେ ସମସ୍ତଙ୍କର ଅପେକ୍ଷା । ଆସନ୍ତା ଜାନୁଆରୀ ୨୨ ତାରିଖରେ ଅନୁଷ୍ଠିତ ହେବାକୁ ଯାଉଛି ଏହି ଭବ୍ୟ ସମାରୋହ । ପ୍ରଭୁଙ୍କ ପ୍ରାଣ ପ୍ରତିଷ୍ଠାକୁ ନେଇ ଜୋରସୋରରେ ପ୍ରସ୍ତୁତି ଚାଲିଥିବା ସମୟରେ ତେଲେଙ୍ଗାନାର ହାଇଦ୍ରାବାଦ ସ୍ଥିତ ସଂଗଠନ ଅଯୋଧ୍ୟା ଭାଗ୍ୟନଗର ସୀତା ରାମ ଫାଉଣ୍ଡେସନ ପ୍ରଭୁଙ୍କ ପାଇଁ ୧.୦୩ କୋଟି ଟଙ୍କା ଚରଣ ପାଦୁକା ଉପହାର ଦେଇଛନ୍ତି ।
ପ୍ରଭୁ ଶ୍ରୀ ରାମଙ୍କ ଚରଣ ପାଦୁକାର ଗୋଟିଏ ହଳ ଅଯୋଧ୍ୟାରେ ପହଁଚି ସାରିଛି । ଏହାର ଅନ୍ୟ ଏକ ହଳ ଭକ୍ତମାନେ ଏକ ପବିତ୍ର ସ୍ଥାନରୁ ପଦ ଯାତ୍ରା କରି ଆଣିବେ । ୧୨.୫ ଇଞ୍ଚ ଲମ୍ବା, ୫.୫ ଇଞ୍ଚ ଚଉଡା ଏବଂ ୧ ଇଞ୍ଚ ମୋଟାର ଶ୍ରୀରାମ ଚରଣ ପାଦୁକା ୧୨.୫ କିଲୋ ସୁନା-ଚାନ୍ଦି-ତମ୍ବା,ପିତଳ ଏବଂ ସ୍ୱଚ୍ଛ କାଚ ଧାତୁରେ ତିଆରି ହୋଇଛି । ଏହି ଚରଣ ପାଦୁକାର ନିର୍ମାଣ ଅଯୋଧ୍ୟାର ବାଗ୍ୟନଗର ସିତାରାମ ଫାଉଣ୍ଡେସନର ସସ୍ଥାପକ-ନିର୍ଦ୍ଦେଶକ ଚିଲ୍ଲା ଶ୍ରୀନିବାସ ଶାସ୍ତ୍ରୀ କରିଛନ୍ତି ।
ତାଙ୍କ କହିବା ମୁତାବକ, ଏହାକୁ ନିର୍ମାଣ କରିବାକୁ ୨୫ ଦିନ ଲାଗିଛି । ଏହାକୁ ଭଗବାନ ଶ୍ରୀରାମଙ୍କ ପାଖରେ ଭେଟି ଦିଆଯିବ । ଆସନ୍ତା ଜାନୁଆରୀ ୧୦ରୁ ୧୫ ଭିତରେ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ଏହି ପାଦୁକା ପ୍ରଦାନ କରାଯିବ ।
