କିଏ ହେବ ପାକିସ୍ତାନର ପରବର୍ତ୍ତୀ ପ୍ରଧାନମନ୍ତ୍ରୀ?

ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ଆଜି ପାକିସ୍ତାନରେ ସାଧାରଣ ନିର୍ବାଚନ। କିଏ ହେବେ ପାକିସ୍ତାନର ପରବର୍ତ୍ତୀ ପ୍ରଧାନମନ୍ତ୍ରୀ ତାକୁ ନେଇ ଏବେ ଚର୍ଚ୍ଚା ଲାଗି ରହିଛି। ପୂର୍ବତନ ପ୍ରଧାନମନ୍ତ୍ରୀ ତଥା ପାକିସ୍ତାନ ମୁସଲିମ୍ ଲିଗର ପ୍ରାର୍ଥୀ ନୱାଜ୍ ସରିଫ୍ ଏଥର ପୁଣି ପ୍ରଧାନମନ୍ତ୍ରୀ ହୋଇପାରନ୍ତି। ନୂଆ ସରକାର ବାଛିବା ପାଇଁ ପ୍ରାୟ ୧୩ କୋଟି ଭୋଟର ଆଜି ମତଦାନ କରୁଛନ୍ତି ।

ନିର୍ବାଚନରେ ପାକିସ୍ତାନ ମୁସଲିମ ଲିଗର ନୱାଜ ସରିଫ, ପାକିସ୍ତାନ ପିପୁଲ୍ସ ପାର୍ଟିର ବିଲାୱଲ ଭୁଟୋ ଜର୍ଦାରି ଏବଂ ଇମ୍ରାନ ଖାନଙ୍କ ପାକିସ୍ତାନ ତେହରିକ-ଇ ଇନସାଫର ପ୍ରାର୍ଥୀଙ୍କ ମଧ୍ୟରେ ମୁକାବିଲା ହେବ । ଏଥରକ ପାକିସ୍ତାନ ନିର୍ବାଚନ ବେଶ ରୋଚକ ହେବାକୁ ଯାଉଛି । କାରଣ ଗୋଟେ ପଟେ ଇମ୍ରାନ ଖାନ ଜେଲରେ ଥିବାବେଳେ ଅନ୍ୟପଟେ ତାଙ୍କ ପରମପ୍ରତିଦ୍ୱନ୍ଦୀ ନୱାଜ ସରିଫ ନିର୍ବାଚନ ଲଢ଼ୁଛନ୍ତି ।

ପାକିସ୍ତାନ ମୁସଲିମ ଲିଗ ମୁଖ୍ୟ ନୱାଜ ସରିଫ କ୍ଷମତାକୁ ଫେରିପାରନ୍ତି । ଚତୁର୍ଥଥର ପାଇଁ ପାକିସ୍ତାନର ପ୍ରଧାନମନ୍ତ୍ରୀ ହେବା ସମ୍ଭାବନା ରହିଛି । ହେଲେ ପାକିସ୍ତାନର ରାଜନୈତିକ ଦୃଶ୍ୟପଟକୁ ଦେଖିଲେ ସରିଫ ସବୁଠୁ ଆଗରେ ଅଛନ୍ତି । କାରଣ ପାକିସ୍ତାନ ସେନା ଆଶୀର୍ବାଦ ତାଙ୍କ ଉପରେ ଅଛି । ତେବେ ସେ ବିଜୟୀ ହୋଇ ପ୍ରଧାନମନ୍ତ୍ରୀ ହେବା ନିଶ୍ଚିତ ।