ଚମ୍ପୁଆ, (ବଡ଼ ଖବର ବ୍ୟୁରୋ): ଚିକିତ୍ସା ଅବହେଳାରୁ ଯୁବକଙ୍କ ମୃତ୍ୟୁ । ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି କେନ୍ଦୁଝର ଜିଲ୍ଲା ଚମ୍ପୁଆ ବ୍ଲକ ଭଣ୍ଡା ପଞ୍ଚାୟତ ରରୁଆଁଗୋଡ଼ାରେ । ଉତ୍ତ୍ୟକ୍ତ ଲୋକେ ଡାକ୍ତରଖାନାର ଗାଡ଼ି ଭଙ୍ଗାରୁଜା କରିଛନ୍ତି । ସୂଚନା ଅନୁଯାୟୀ, ଗ୍ରାମର ବଲ୍ଲଭ ନାୟକଙ୍କ ପୁଅ ରହିତାସ୍ୟ ନାୟକ ଗତ କିଛିଦିନରୁ ଜ୍ୱରରେ ପୀଡ଼ିତ ଥିଲେ । ଉଚ୍ଚବାଲି ପଞ୍ଚାୟତ ପଦ୍ମପୁରଠାରେ ତାଙ୍କର କରୋନା ପରୀକ୍ଷା କରାଯାଇଥିଲା । ଗତକାଲି ତାଙ୍କ ରିପୋର୍ଟ ପଜିଟିଭ ଆସିଥିଲା । ଡାକ୍ତରଙ୍କ ପରାମର୍ଶ କ୍ରମେ ସେ ଘରେ ରହି ଚିକିତ୍ସିତ ହେଉଥିଲେ । ଆଜି ସକାଳେ ମେଡିକାଲ ଟିମ୍ ଚିକିତ୍ସା କରିବାକୁ ଆସିଥିବାବେଳେ ରହିତାସ୍ୟଙ୍କ ମୃତ୍ୟୁ ହୋଇଥିବା ଜଣାପଡ଼ିଥିଲା । ଏହାକୁ ନେଇ ଉତ୍ତେଜନା ପ୍ରକାଶ ପାଇଥିଲା । ଠିକ୍ ସମୟରେ ଚିକିତ୍ସା କରା ନ ଯିବାରୁ ତାଙ୍କ ମୃତ୍ୟୁ ହୋଇଥିବା ଗ୍ରାମବାସୀ ଅଭିଯୋଗ କରିଥିଲେ । ଫଳରେ ସେଠାରେ ତୀବ୍ର ଉତ୍ତେଜନା ପ୍ରକାଶ ପାଇଥିଲା । ଉତ୍ତ୍ୟକ୍ତ ଲୋକେ ମେଡିକାଲ ଗାଡ଼ି ଭଙ୍ଗାରୁଜା କରିଥିଲେ । ଚମ୍ପୁଆ ପୋଲିସ ଓ ଭଣ୍ଡା ଚିକିତ୍ସା ଅଧିକାରୀ ଦୀପକ କୁମାର ସାହୁ ସେଠାରେ ପହଞ୍ଚି ଲୋକଙ୍କୁ ବୁଝାଶୁଝା କରିବା ପରେ ପରିସ୍ଥିତି ଶାନ୍ତ ପଡ଼ିଥିଲା । ପରେ ଶବକୁ କରୋନା କଟକଣା ମଧ୍ୟରେ ସଂସ୍କାର କରାଯାଇଛି ।
