ରାୟଗଡ଼ା (ବଡ଼ ଖବର ବ୍ୟୁରୋ): ସିଯି ମାଳି ଗର୍ଭରେ ଥିବା ବକ୍ସାଇଟ ବେଦାନ୍ତକୁ ଦେବା ପାଇଁ ପ୍ରକ୍ରିୟା ଶାସକ ତଥା ବିଜେଡି ଦଳ ପାଇଁ କଣ୍ଟା ହେଲା କି ? ଏହାର ପ୍ରତିଫଳନ ସଦୃଶ୍ୟ ଏହି ତିନୋଟି ପଞ୍ଚାୟତର ପ୍ରାୟ ୨୦ ରୁ ୨୨ ଟି ଗ୍ରାମର ଲୋକଙ୍କ ଏହି ସିଯି ମାଳି ବିରୋଧକୁ ନେଇ ଏକ ମେଳି ବାନ୍ଧିଛନ୍ତି । ଉକ୍ତ ସିଜି ମାଳି ପାଇଁ ଜନଶୁଣାଣୀ କରିବା ପୂର୍ବରୁ ଦମନ ଲୀଳା କରି ସରକାରଙ୍କ ଦ୍ଵାରା କଠୋର ନୀତି ଅବଲମ୍ବନ ଫଳରେ ଉକ୍ତ ଖଣି ପ୍ରଭାବିତ ଅଞ୍ଚଳର ଶତାଧିକ ଆଦିବାସୀ ଓ ଦଳିତ ଯୁବକଙ୍କୁ ଜେଲ ଭିତରେ ସଢ଼ିବାକୁ ପଡ଼ିଥିଲା ।
ଯାହାର ବିରୋଧର ଫଳ ସ୍ୱରୂପ ବର୍ତ୍ତମାନ ୨୦୨୪ ନିର୍ବାଚନ ବେଳେ ଉକ୍ତ ତିନୋଟି ପଞ୍ଚାୟତର ଅଞ୍ଚଳବାସୀ ତଥା ସ୍ଵତନ୍ତ୍ର ଭାବେ ଆଦିବାସୀ ମହିଳାମାନେ ଏକତ୍ରିତ ହୋଇ ସରକାର ତଥା ଶାସକ ଦଳ ବିଜେଡିକୁ ବିରୋଧ କରି ଏକ ନୂତନ ରାଜନୈତିକ ପାର୍ଟି ଅଲ୍ ଇଣ୍ଡିଆ ମାତୃଭୂମି ନବନିର୍ମାଣ ପାର୍ଟି ଗଠନ କରିବା ସହ ଏକ ଶିକ୍ଷିତ ଆଦିବାସୀ ଯୁବତୀଙ୍କ ନିଜର ପ୍ରତିନିଧି ପ୍ରାର୍ଥି କରି ଗଣତାନ୍ତ୍ରିକ ପଦ୍ଧତିରେ ସରକାର ତଥା ଶାସକ ଦଳର ମୁକାବିଲା କରିବା ପାଇଁ ଅଣ୍ଟା ଭିଡିଛନ୍ତି । ଯାହାକି ଶାସକ ବିଜେଡି ଦଳ ପାଇଁ ଚଳିତ ନିର୍ବାଚନରେ କଣ୍ଟା ହେବା ସହ ବିଜୟର ବାଟ ଓଗାଳିବା ଏକ ପ୍ରକାର ନିଶ୍ଚିତ ବୋଲି ସାଧାରଣରେ ଚର୍ଚ୍ଚା ଚାଲିଛି । ଏଭଳି ଗଣତାନ୍ତ୍ରିକ ଉପାୟରେ ବିରୋଧ କରି ଉକ୍ତ ଅଞ୍ଚଳର ଲୋକଙ୍କ ପ୍ରୟାସକୁ ଅନେକାଂଶରେ ଏହି ନିର୍ବାଚନୀମଣ୍ଡଳିରେ ଲୋକ ପ୍ରଶଂସା କରୁଥିବା ସହ ଉକ୍ତ ମହିଳା ପ୍ରାର୍ଥୀ ଶ୍ରୀମତୀ ମାଝିଙ୍କୁ ସମର୍ଥନ କରୁଥିବା ଜଣାପଡ଼ିଛି ।
ଯାହାକି ଶାସକ ବିଜେଡି ଦଳ ପାଇଁ ଚଳିତ ନିର୍ବାଚନରେ ଏକ ଶକ୍ତ ଧକ୍କା ସହ ବିଜୟ ପଥର କଣ୍ଟା ବୋଲି ରାଜନୈତିକ ସମୀକ୍ଷକ ମାନେ ମତ ପ୍ରକାଶ କରିଛନ୍ତି । ଯାହାକି ଉକ୍ତ ଖଣି ପ୍ରଭାବିତ ଅଞ୍ଚଳର ତିନୋଟି ପଞ୍ଚାୟତର ଅଞ୍ଚଳବାସୀ ମତ ବ୍ୟକ୍ତ କରିଛନ୍ତି ଯେ ଆମେ ଆଇନ ଅନୁଯାୟୀ ଗଣତାନ୍ତ୍ରିକ ପଦ୍ଧତିରେ ବିଶ୍ବାସ କରୁ ଏବଂ ଏହି ପଦ୍ଧତିରେ ହିଁ ଆମେ ଆମର ହକ ତଥା ଆମର ଜୀବନ ଜୀବିକା ଯେଉଁ ଜଳ, ଜଙ୍ଗଲ ଦ୍ଵାରା ପାଉଥିଲୁ ସେହି ଅଧିକାର ପାଇଁ ଲଢେଇ କରୁଛୁ ଓ ଏହି ଲଢେଇ ଶେଷ ପର୍ଯ୍ୟନ୍ତ ଜାରି ରହିବ ।
