ବିରାଟ ବାହିନୀର ବିରାଟ ବିଜୟ
ଭୁବନେଶ୍ୱର (ବଡ଼ ଖବର ବ୍ୟୁରୋ): ଦିନିକିଆ ପରାଜୟର ପ୍ରତିଶୋଧ ନେଲା ବିରାଟ ବାହିନୀ । ଦିନିକିଆ ସିରିଜରେ ୨-୧ରେ ପରାଜୟ ବରଣ କରିଥିବା ଭାରତ ଟି-୨୦ରେ ଗୋଟିଏ ମ୍ୟାଚ ବାକି ଥିବା ପୂର୍ବରୁ ୨-୦ରେ ଆଗୁଆ ରହିବା ସହ ସିରିଜକୁ ଅକ୍ତିଆର କରିଛି । ଦ୍ୱିତୀୟ ଟି-୨୦ ୬ ୱିକେଟରେ ବିଜୟୀ ହୋଇଛି ଭାରତ । ହାର୍ଦ୍ଧିକ ପାଣ୍ଡ୍ୟାଙ୍କ ଦମଦାର ଛକା ବଳରେ ଦଳ ୩ଟି ବଲ ପୂର୍ବରୁ ବିଜୟୀ ହୋଇଥିଲା ।
ଭାରତ ପ୍ରଥମେ ଟସ୍ ଜିତି ବୋଲିଂ କରିବାର ନିଷ୍ପତ୍ତି ନେଇଥିଲା । ଅଷ୍ଟ୍ରେଲିଆ ନିର୍ଦ୍ଧାରିତ ୨୦ ଓଭର ମଧ୍ୟରେ ୫ ୱିକେଟ ବିନିମୟରେ ୧୯୪ ରନ କରିବାରେ ସକ୍ଷମ ହୋଇଥିଲା । କଙ୍ଗାରୁ ଦଳର ପ୍ରାରମ୍ଭିକ ବ୍ୟାଟ୍ସମ୍ୟାନ ୱେଡ ଧୂଆଁଧାର ଅର୍ଦ୍ଧଶତକ ଅର୍ଜନ କରିଥିଲେ । ସ୍କିଥ୍ ୩୮ ବଲରୁ ୪୪ ରନ କରିବାରେ ସକ୍ଷମ ହୋଇଥିଲେ । ଭାରତ ପକ୍ଷରୁ ଟି ନଟରାଜନ ୨ଟି ୱିକେଟ ଅକ୍ତିଆର କରିଥିବା ବେଳେ ସାର୍ଦ୍ଧୁଲ ଠାକୁର ଏବଂ ଚହଲ ଗୋଟିଏ ଲେଖାଏଁ ୱିକେଟ ଅକ୍ତିଆର କରିଥିଲେ ।
୧୯୫ ରନକୁ ପିଛା କରିବାକୁ ଯାଇ ଭାରତ ୩ ବଲ ପୂର୍ବରୁ ବିଜୟୀ ହୋଇଛି । ଭାରତ ପକ୍ଷରୁ ଦୁଇ ପ୍ରାରମ୍ଭିକ ବ୍ୟାଟ୍ସମ୍ୟାନ ରାହୁଲ ଏବଂ ଧାୱନ ଅର୍ଦ୍ଧଶତକୀୟ ପାଟନରସିପ ପାଳି ଖେଳିଥିଲେ । ଧାୱନ ୫୨ ରନ କରିଥିବା ବେଳେ ରାହୁଲ ୩୦ ରନ କରିଥିଲେ । ଫାଷ୍ଟଡାଉନରେ ଆସି ବିରାଟ କୋହଲି ୪୦ ରନ କରିଥିଲେ । ସବୁଠାରୁ ଦମଦାର ଇନିଂସ ଖେଳିଥିଲେ ହାର୍ଦ୍ଧିକ ପାଣ୍ଡ୍ୟା ଏବଂ ଶ୍ରେୟସ ଆୟାର । ପାଣ୍ଡ୍ୟା ୨୨ ବଲରୁ ୪୨ ରନ କରିଥିବା ଥିବା ବେଳେ ଆୟାର ୫ ବଲରୁ ୧୨ କରିବାରେ ସକ୍ଷମ ହୋଇଥିଲେ ।