ବାଲିଆପାଳ, (ବଡ଼ ଖବର ବ୍ୟୁରୋ): ବାଲେଶ୍ୱର ଜିଲ୍ଲା ବାଲିଆପାଳ ବ୍ଲକ ଦେଉଳା ପଞ୍ଚାୟତ ବାସୁଦେବପୁର ଗ୍ରାମ ଗୋଚର ଜମିରେ କମ୍ୟୁନିଟି ଟୟଲେଟ୍ ନିର୍ମାଣକୁ ଗ୍ରାମବାସୀ ବିରୋଧ କରିଛନ୍ତି । ଗ୍ରାମବାସୀ ଏ ନେଇ ବିଡିଓ ଓ ତହସିଲଦାରଙ୍କ ନିକଟରେ ଲିଖିତ ଅଭିଯୋଗ କରିଛନ୍ତି । ଗ୍ରାମରେ ବହୁ ଅନାବାଦି ଜମି ଥିବାବେଳେ ଉଦ୍ଦେଶ୍ୟମୂଳକ ଭାବେ ଗୋଚର ଜମିରେ ଶୌଚାଳୟ ନିର୍ମାଣ କାହିଁକି ବୋଲି ପ୍ରଶ୍ନ କରିଛନ୍ତି ଗ୍ରାମବାସୀ। ଏହାକୁ ନେଇ ଗ୍ରାମବାସୀଙ୍କ ମଧ୍ୟରେ ଉତ୍ତେଜନା ମୂଳକ ପରିସ୍ଥିତି ସୃଷ୍ଟି ହୋଇଥିଲା । ତହସିଲଦାର ଦୀପକ୍ କୁମାର ଦାସ ଘଟଣାର ତଦନ୍ତ କରି ପଦକ୍ଷେପ ନେବାକୁ ପ୍ରତିଶ୍ରୁତି ଦେଇଛନ୍ତି। ଗୋଚର କିସମ ଜମିରେ ନିର୍ମାଣ କାର୍ୟ୍ୟ ହେବାକୁ ହାଇକୋର୍ଟ ବାରଣ କରିଥିବା ସତ୍ତେ୍ୱ ଖୋଦ ସରକାରୀ କାର୍ୟ୍ୟାଳୟ ଏହି ନିୟମକୁ ବିରୋଧ କରି ନିର୍ମାଣ କାର୍ୟ୍ୟ କରୁଛି । ଏହି ଘଟଣାରେ ସ୍ଥାନୀୟ ପ୍ରଶାସନ କ’ଣ ପଦକ୍ଷେପ ନେଉଛି ଦେଖିବାକୁ ବାକି ରହିଲା।
