ବ୍ରହ୍ମପୁର, (ବଡ଼ ଖବର ବ୍ୟୁରୋ): ବ୍ରହ୍ମପୁର ପୋଲିସକୁ ମିଳିଛି ବଡ଼ ସଫଳତା। କିଛି ଦିନ ହେବ ଅନଲାଇନ ମାଧ୍ୟମରେ ଆଇପିଏଲ ବେଟିଂ ଚାଲିଥିବା ଖବର ପାଇ ଦକ୍ଷିଣାଞ୍ଚଳ ଡିଆଇଜି ସତ୍ୟବ୍ରତ ଭୋଇଙ୍କ ତତ୍ତ୍ୱାବଧାନରେ ଓ ଏସପି ପିନକ୍ ମିଶ୍ରଙ୍କ ନେତୃତ୍ୱରେ ଏକ ଟିମ୍ ଗଠନ କରାଯାଇଥିଲା। ଏଥିରେ ଆଡିସନାଲ୍ ଏସପି, ଗୋଷାଣୀ ନୂଆଗାଁ ଥାନା ଅଧିକାରୀ ଓ ବଡ଼ବଜାର ଥାନା ଅଧିକାରୀ ସାମିଲ ହୋଇ ଏହି ବେଟିଂ ରାକେଟ ଠାବ କରିଥିଲେ। ଏଥିରେ ଦୁଇ ଜଣଙ୍କୁ ଗିରଫ କରାଯାଇଛି । ସେମାନଙ୍କଠାରୁ ୩୩ ଲକ୍ଷ ୬୧ ହଜାର ୨୦୦ ଟଙ୍କା ଜବତ କରିବା ସହି ୪ ମୋବାଇଲ୍ ଓ ୩ ଏଟିଏମ୍ କାର୍ଡ ମଧ୍ୟ ଜବତ କରାଯାଇଛି। ଗିରଫ ହୋଇଥିବା ଦୁଇଜଣ ହେଉଛନ୍ତି ଗୋଷାଣୀ ନୂଆଗାଁ ଥାନା ଅନ୍ତର୍ଗତ ଗଣେଶ ନଗର ତୃତୀୟ ଗଳିର ଆର.ଲାଲି ଆଚରୀ (୫୫) ଓ ବଡ଼ ବଜାର ଥାନା ଅନ୍ତର୍ଗତ ସାଇ କମ୍ପ୍ଲେକ୍ସର କେ.ପ୍ରଶାନ୍ତ କୁମାର ସୁବୁଦ୍ଧି (୪୩) । ଏମାନେ ଏକ ଆପ ମାଧ୍ୟମରେ କୋଲକାତା, ମୁମ୍ବାଇ, ଦିଲ୍ଲୀ ଏପରିକି ବିଦେଶ ଦୁବାଇର ବୁକୀମାନଙ୍କ ଲିଙ୍କରେ ରହି ବହୁ ଛାତ୍ର ଯୁବକଙ୍କୁ ଫାନ୍ଦରେ ପକାଇ କୋଟି କୋଟି ଟଙ୍କାର ଲାଭବାନ ହେଉଥିଲେ। ଏନେଇ ଦକ୍ଷିଣାଞ୍ଚଳ ଡିଆଇଜି ସତ୍ୟବ୍ରତ ଭୋଇ ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି। ଏହା ସହିତ ଏହି ର୍ୟାକେଟରେ କେଉଁମାନେ ସଂଶ୍ଳିଷ୍ଟ ଅଛନ୍ତି ତାହା ଅନୁସନ୍ଧାନ କରାଯାଉଥିବା ମଧ୍ୟ ସୂଚନା ଦେଇଛନ୍ତି।
