ଚାରମାଳ ଉପରେ ପଡିଗଲେ ବଡଠାକୁର, ମାଳିକାର ପଂକ୍ତିକୁ ନେଇ ବଢିଲା ଚର୍ଚ୍ଚା

ପୁରୀ (ବଡ଼ ଖବର ବ୍ୟୁରୋ): ପୁରୀରେ ଆଡ଼ପ ପହଣ୍ଡି ବେଳେ ଅଘଟଣ ନେଇ ଏବେ ସବୁଠି ଚର୍ଚ୍ଚା । ପହଣ୍ଡି ବେଳେ ବଡ଼ ଠାକୁର ଚାରମାଳରୁ ଖସିପଡିବା ପରେ ଏବେ ଭକ୍ତଙ୍କ ମଧ୍ୟରେ ଭୟ ଓ ଆଶଙ୍କା । ମହାପ୍ରଭୁ ଚାରମାଳରୁ ଖସି ପଡିବା ଏହା କିଛି ଅଶୁଭ ସଙ୍କେତ ଦେଉଛି କି? କାହିଁକି ଏଭଳି ପଡ଼ି ଗଲେ ମହାପ୍ରଭୁ ବଳଭଦ୍ର ? ଅଘଟଣକୁ ନେଇ ଭକ୍ତ ଓ ସେବାୟତଙ୍କ ମଧ୍ୟରେ ଭିନ୍ନଭିନ୍ନ ପ୍ରତିକ୍ରିୟା । ଏପରି ବିଭ୍ରାଟକୁ ନେଇ ଶ୍ରଦ୍ଧାଳୁଙ୍କ ମଧ୍ୟରେ ଅସନ୍ତୋଷ ଦେଖିବାକୁ ମିଳିଛି। ଏହାଭିତରେ ସୋସିଆଲ ମଡିଆରେ ଏକ ଲେଖା ଭାଇରାଲ ହେଉଛି। ଯାହାକୁ ମାଳିକାର ଏକ ପୃଷ୍ଠା ବୋଲି ସୋସିଆଲ ମିଡିଆରେ କୁହାଯାଉଛି। ବିଭ୍ରାଟ ଘଟିବା ପରଠାରୁ ଏହି ଲେଖା ବହୁଳ ମାତ୍ରାରେ ଭାଇରାଲ ହେଉଛି। ଏଥିରେ ସଂସ୍କୃତ ସହ ଓଡ଼ିଆ ଲେଖା ମଧ୍ୟ ରହିଛି। ଏଥିରେ ଲେଖାଅଛି ଯେ, ଅସାବଧାନତା ଯୋଗୁ ଯଦି ଜଗନ୍ନାଥ, ବଳଭଦ୍ର କିମ୍ବା ସୁଭଦ୍ରା ତଳେ ପଡ଼ିଯାଆନ୍ତି ତେବେ ରାଜାଙ୍କର ଓ ରାଜ୍ୟର ମହା ଅନିଷ୍ଟ ହେବ। ଦୁର୍ଭିକ୍ଷ ପଡ଼ିବ। ମହାମାରୀ ବାରମ୍ବାର ହେବ।

ଏପରି ଲେଖା ଭାଇରାଲ ହେବା ପରେ ଲୋକଙ୍କ ମଧ୍ୟରେ ଆଶଙ୍କା ସୃଷ୍ଟି ହୋଇଛି। ଗତକାଲି ସନ୍ଧ୍ୟା ୭ଟାରେ ଆଡପ ପହଣ୍ଡି ଆରମ୍ଭ ହୋଇଥିଲା। ବଡ଼ ଠାକୁର ବଳଭଦ୍ରଙ୍କ ପହଣ୍ଡି ଆରମ୍ଭ ହୋଇଥିଲା। ବଡ଼ଠାକୁର ବଳଭଦ୍ରଙ୍କୁ ତାଳଧ୍ବଜରୁ ପହଣ୍ଡିରେ ତଳକୁ ଅଣାଯାଉଥିଲା । ଏହି ସମୟରେ ହଠାତ୍ ଚାରମାଳ ଉପରେ ହାମୁଡେଇ ପଡ଼ି ଯାଇଥିଲେ ବଡ଼ ଠାକୁର। ଫଳରେ ସେବାୟତମାନେ ରଥ ତଳକୁ ଖସି ପଡ଼ିଥିଲେ। ବହୁ କଷ୍ଟରେ ସେବାୟତମାନେ ବଡ଼ ଠାକୁରଙ୍କୁ ଉଠାଇ ଚାରମାଳ ଉପରେ ବସାଇ ଦେଇଥିଲେ । ଏଥିରେ ଆହତ ହୋଇଥିବା ସେବାୟତଙ୍କୁ ତୁରନ୍ତ ଆମ୍ବୁଲାନ୍ସ ଯୋଗେ ଜିଲ୍ଲା ମୁଖ୍ୟ ଡାକ୍ତରଖାନାକୁ ନିଆଯାଇଥିଲା । ଆହତ ୭ଜଣ ସେବାୟତଙ୍କ ମଧ୍ୟରୁ ଅନେକଙ୍କୁ ପ୍ରାଥମିକ ଚିକିତ୍ସା ପରେ ଛାଡି ଦିଆଯାଇଛି ଓ ସମସ୍ତେ ବିପଦମୁକ୍ତ ଥିବା ଜଣାପଡିଛି ।