ଆତ୍ମସମର୍ପଣ କଲେ ୨୫ ମାଓବାଦୀ

ମାଲକାନଗିରି (ବଡ଼ ଖବର ବ୍ୟୁରୋ): ମାଲକାନଗିରି ସୀମାନ୍ତ ଛତିଶଗଡର ବିଜାପୁର ଜିଲ୍ଲା ପୋଲିସ ନିକଟରେ ଆତ୍ମସମର୍ପଣ କଲେ ୨୫ ମାଓବାଦୀ । ଆତ୍ମସମର୍ପଣ କରିଥିବା ମାଓବାଦୀଙ୍କ ମୁଣ୍ଡ ଉପରେ ଥିଲା ୩୭ ଲକ୍ଷ ଟଙ୍କାର ପୁରସ୍କାର ରାଶି । ବିଜାପୁର ଜିଲ୍ଲାର ଭୈରବଗଡ ଓ ଗାଙ୍ଗାଲୁର ଏରିଆ କମିଟିର ଏହି ୨୫ ଜଣ ଇନାମୀ ନକ୍ସଲ ପୋଲିସ ନିକଟରେ ଆତ୍ମସମର୍ପଣ କରିଛନ୍ତି । ଆତ୍ମସମର୍ପଣ ପରେ ନକ୍ସଲମାନେ କହିଛନ୍ତି ଯେ ସରକାରଙ୍କ ପୁନର୍ବାସ ନୀତି ଏବଂ ବିଜାପୁର ପୁଲିସର ‘ନିୟଦ ନେଲା ନାର’ ଯୋଜନାରେ ପ୍ରଭାବିତ ହୋଇ ସେମାନେ ଆତ୍ମସମର୍ପଣ କରିବା ଲାଗି ପଦକ୍ଷେପ ନେଇଛନ୍ତି ।

ଚଳିତ ବର୍ଷ ଏପର୍ଯ୍ୟନ୍ତ ୧୭୦ ଜଣ ମାଓବାଦୀ ପୋଲିସ ନିକଟରେ ଆତ୍ମସମର୍ପଣ କରିଛନ୍ତି । ଅନ୍ୟ ପକ୍ଷରେ ବିଭିନ୍ନ ମାଓ ହିଂସାରେ ସମ୍ପୃକ୍ତ ୩୪୬ ଜଣ ନକ୍ସଲଙ୍କୁ ବିଜାପୁର ପୋଲିସ ଗିରଫ କରିଛି । ବରିଷ୍ଠ ମାଓବାଦୀଙ୍କ ଦ୍ୱାରା ନିର୍ଯାତନା ଓ ମାନସିକ ଶାରୀରିକ ନିର୍ଯାତନାରେ ଅତିଷ୍ଠ ହୋଇ ଏହି ନକ୍ସଲମାନେ ସମାଜର ମୁଖ୍ୟ ସ୍ରୋତକୁ ଫେରିବାକୁ ନିଷ୍ପତ୍ତି ନେଇଛନ୍ତି ।