୩ରାଜ୍ୟ ପାଇଁ ପ୍ରଭାରୀ ଓ ସହପ୍ରଭାରୀ ନିଯୁକ୍ତି

ଭୁବନେଶ୍ୱର (ବଡ଼ ଖବର ବ୍ୟୁରୋ): ବିଜେପି ପକ୍ଷରୁ ତିନିଟି ରାଜ୍ୟ ପାଇଁ ନୂଆ ପ୍ରଭାରୀ ଓ ସହପ୍ରଭାରୀଙ୍କୁ ଦାୟିତ୍ୱ ଦିଆଯାଇଛି। ଉତ୍ତରପ୍ରଦେଶ, ପଞ୍ଜାବ ଓ ଗୁଜରାଟ ପାଇଁ ଦଳ ପକ୍ଷରୁ ଏହି ନିଯୁକ୍ତି ଘୋଷଣା କରାଯାଇଛି। ଉତ୍ତରପ୍ରଦେଶ ପାଇଁ ବିନୋଦ ତାୱଡ଼େଙ୍କୁ ପ୍ରଭାରୀ ଭାବେ ନିଯୁକ୍ତ କରାଯାଇଥିବା ବେଳେ ଜଗଦୀଶ ଈଶ୍ୱରଭାଇ ପଟେଲଙ୍କୁ ସହପ୍ରଭାରୀ ଦାୟିତ୍ୱ ମିଳିଛି। ସେହିପରି ପଞ୍ଜାବ ପାଇଁ ସତୀଶ ପୁନିଆଙ୍କୁ ପ୍ରଭାରୀ ଦାୟିତ୍ୱ ଦିଆଯାଇଛି। ଗୁଜରାଟ ପାଇଁ ତରୁଣ ଚୁଗଙ୍କୁ ପ୍ରଭାରୀ ଭାବେ ଦଳ ଦାୟିତ୍ୱ ଦେଇଛି।

ଏହି ନିଯୁକ୍ତି ମାଧ୍ୟମରେ ଉକ୍ତ ରାଜ୍ୟଗୁଡ଼ିକରେ ଦଳୀୟ ସଂଗଠନକୁ ଆହୁରି ସୁଦୃଢ଼ କରିବା ଏବଂ ରାଜନୈତିକ କାର୍ୟ୍ୟକଳାପରେ ସମନ୍ୱୟ ବଢ଼ାଇବା ଦିଗରେ ବିଜେପି ଗୁରୁତ୍ୱ ଦେଇଛି।
ତେବେ, ଦଳର ରାଷ୍ଟ୍ରୀୟ ଅଧ୍ୟକ୍ଷ ନୀତିନ ନବୀନଙ୍କ ନିର୍ଦ୍ଦେଶକ୍ରମେ ଏହି ଦାୟିତ୍ୱ ବଣ୍ଟନ କରାଯାଇଥିବା ନେଇ ସୂଚନା ମିଳିଛି। ନୂଆ ଦାୟିତ୍ୱ ମିଳିଥିବା ନେତାମାନେ ଆଗାମୀ ଦିନରେ ନିଜ ନିଜ ରାଜ୍ୟରେ ସଂଗଠନକୁ କିଭଳି ଆଗକୁ ନେଉଛନ୍ତି, ତାହା ଉପରେ ନଜର ରହିବ।