କୂଅରେ ପଡି ଶିଶୁ କନ୍ୟାର ମୃତ୍ୟୁ
କାମାକ୍ଷାନଗର (ବଡ଼ ଖବର ବ୍ୟୁରୋ): ଢେଙ୍କାନାଳ ଜିଲ୍ଲା ତୁମୁସିଙ୍ଗା ଥାନା ଗାଙ୍ଗୀଯୋଡି ଗାଁରେ କୂଅରେ ପଡି ଜଣେ ୮ବର୍ଷର ଶିଶୁକନ୍ୟାର ମୃତ୍ୟୁ ହୋଇଛି । ମୃତ ଶିଶୁକନ୍ୟା ଜଣକ ହେଉଛି ଗାଁର ସୁମନ୍ତ ପ୍ରଧାନଙ୍କ ଝିଅ ସୁନାଲି ପ୍ରଧାନ । ସୂଚନା ଅନୁଯାୟୀ, ସୁନାଲି ନିଜ ସାଙ୍ଗମାନଙ୍କ ସହିତ ଖେଳୁଥିବା ବେଳେ ଅସାବଧାନତା କାରଣରୁ କୂଅ ଭିତରେ ପଡ଼ି ଯାଇଥିଲେ । ସାଥି ପିଲାମାନଙ୍କର ଚିତ୍କାର ଶୁଣି ସ୍ଥାନୀୟ ଲୋକମାନେ ଦୌଡ଼ି ଆସି ଥିଲେ, ମାତ୍ର କୂଅରୁ ଉଦ୍ଧାର କରି ପାରିନଥିଲେ ।
ପରେ ଅଗ୍ନିଶମ ବାହିନୀଙ୍କୁ ଖବର ଦେବାପରେ କର୍ମଚାରୀଙ୍କ ସହାୟତାରେ ଶିଶୁକନ୍ୟାଟିକୁ କୂଅ ମଧ୍ୟରୁ ଉଦ୍ଧାର କରାଯାଇ କାମାକ୍ଷାନଗର ମେଡ଼ିକାଲରେ ଭର୍ତ୍ତି କରାଯାଇଥିଲା । ମାତ୍ର ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଏ ନେଇ ମେଡ଼ିକାଲ ପରିସରରେ କିଛି ସମୟ ଧରି ଶୋକାକୁଳ ପରିସ୍ଥିତି ସୃଷ୍ଟି ହୋଇଥିଲା ।