ଟାଙ୍ଗୀ (ବଡ଼ ଖବର ବ୍ୟୁରୋ): ରାଜ୍ୟ ସରକାର ବୃଦ୍ଧବୃଦ୍ଧାଙ୍କ ଲାଗି ମଧୁବାବୁ ପେନସନ୍ ଯୋଜନାରେ ଭତ୍ତା ଯୋଗାଇ ଦେଉଛନ୍ତି । ହେଲେ ବୟସର ଅପରାହ୍ନରେ ମଧ୍ୟ ସରକାରଙ୍କ ଦୃଷ୍ଟି ପଡ଼ୁନି ବୃଦ୍ଧ ଦମ୍ପତିଙ୍କ ଉପରେ। ଏପରି ଦୃଶ୍ୟ ଦେଖିବାକୁ ମିଳିଛି ଖୋର୍ଦ୍ଧା ଜିଲ୍ଲା ଟାଙ୍ଗୀ ବ୍ଲକ ଡିଆଁ ପଞ୍ଚାୟତ କପିଳେଶ୍ୱରପୁର ଗାଁରେ । ଏହି ଗାଁର ଅଧିକାରୀ ଜେନାଙ୍କ ବୟସ ୭୪ ଓ ତାଙ୍କ ସ୍ତ୍ରୀ ରାଧାମଣୀ ଜେନାଙ୍କ ବୟସ ୬୫ ବର୍ଷ ହେଲାଣି । ଅଧିକାରୀଙ୍କ ୪ ପୁଅ, ବୋହୂ ଓ ନାତି, ନାତୁଣୀ ଅଛନ୍ତି। ହେଲେ ପରିଣତ ବୟସରେ ସମସ୍ତେ ବୃଦ୍ଧ ଦମ୍ପତିଙ୍କୁ ସେବାଯତ୍ନ କରିବା ବଦଳରେ ଦୂରେଇ ଦେଇଛନ୍ତି। ଅଣ୍ଟା ନଇଁ ଗଲାଣି ତଥାପି ଗାଈ ପାଳନ କରି ରାଧାମଣୀ ଦୁଗ୍ଧ ସଂଗ୍ରହ କରନ୍ତି ଓ ଅଧିକାରୀ ଦୁଆର ଦୁଆର ବୁଲି କ୍ଷୀର ବିକ୍ରି କରି ଯାହା ରୋଜଗାର କରନ୍ତି ସେଥିରେ ଚଳନ୍ତି। ହେଲେ ମଧୁବାବୁ ପେନସନ ଯୋଜନାରୁ ବଞ୍ଚିତ ହେଇଛନ୍ତି ଏହି ବୃଦ୍ଧ ଦମ୍ପତି। ପରିଣତ ବୟସରେ ବି ସେମାନଙ୍କୁ ମିଳି ନାହିଁ ଭତ୍ତା । ଏ ନେଇ ସ୍ଥାନୀୟ ସରପଞ୍ଚଙ୍କ ପ୍ରତିକ୍ରିୟା ମିଳିପାରି ନ ଥିବାବେଳେ ଟାଙ୍ଗୀ ବିଡିଓ ଅକ୍ଷୟ ରାଉତଙ୍କୁ ଯୋଗାଯୋଗ କରାଯାଇଥିଲା । ସେ କ୍ୟାମେରା ସମ୍ମୁଖରେ ପ୍ରତିକ୍ରିୟା ଦେବାକୁ ଅନିଚ୍ଛା ପ୍ରକାଶ କରିଥିଲେ ମଧ୍ୟ ଖୁବଶୀଘ୍ର ବାର୍ଦ୍ଧକ୍ୟ ଭତ୍ତା ଯୋଗାଇ ଦିଆଯିବ ବୋଲି ପ୍ରତିଶ୍ରୁତି ଦେଇଛନ୍ତି ।
