ଶ୍ମଶାନରୁ ୩ ଶବ ଗାୟବ
ଭଣ୍ଡାରିପୋଖରୀ (ବଡ଼ ଖବର ବ୍ୟୁରୋ): ଗୋଟିଏ ପଟେ ପରିବାର ଲୋକେ ନିଜ ପ୍ରିୟଜନଙ୍କ ଶେଷକୃତ୍ୟ ସମ୍ପନ୍ନ କରି ଗ୍ରାମକୁ ଫେରୁଛନ୍ତି, ଅନ୍ୟପଟେ ରାତିର ଅନ୍ଧାରରେ ସ୍ୱର୍ଗଦ୍ୱାରରୁ ଗାଏବ ହୋଇଯାଉଛି ଶବ । ଭଦ୍ରକ ଜିଲ୍ଲା ଭଣ୍ଡାରିପୋଖରୀ ଥାନା ଅନ୍ତର୍ଗତ ମଣିନାଥପୁରରୁ ଆସିଛି ଏକ ଚାଞ୍ଚଲ୍ୟକର ଖବର । ବୈତରଣୀ ନଦୀ କୂଳ ସ୍ୱର୍ଗଦ୍ୱାରରୁ ଗତକାଲି ବିଳମ୍ବିତ ରାତିରେ ଗାଏବ ହୋଇଯାଇଛି ୩ଟି ଶବ । ଗୋଟିଏ କି ଦୁଇଟି ନୁହେଁ, ଗତ ୮ ମାସ ମଧ୍ୟରେ ଏହି ସ୍ୱର୍ଗଦ୍ୱାରରୁ ଗାଏବ ହେଲାଣି ୧୫ରୁ ଊର୍ଦ୍ଧ୍ୱ ଶବ । ଶବ ରାକେଟକୁ ଧରିବା ପାଇଁ ପୋଲିସ ପ୍ରଶାସନ ପ୍ରତିଶ୍ରୁତି ଦେଇଥିଲେ ବି ଏପର୍ଯ୍ୟନ୍ତ କୌଣସି ଅଭିଯୁକ୍ତ ଗିରଫ ନହେବା ପୋଲିସର କାର୍ଯ୍ୟାନୁଷ୍ଠାନ ଉପରେ ପ୍ରଶ୍ନବାଚୀ ସୃଷ୍ଟି କରିଛି ।
ସେପଟେ ୩ଟି ଶବ ଗାଏବ ହେବା ସ୍ଥାନୀୟ ଅଞ୍ଚଳରେ ତୀବ୍ର ଅସନ୍ତୋଷ ଓ ଆଶଙ୍କା ସୃଷ୍ଟି କରିଛି । ଗତ ୮ ମାସ ଭିତରେ ଏଠାରୁ ଏକାଧିକ ଶବ ଗାଏବ ହେବା ପରେ ପୋଲିସ ପକ୍ଷରୁ ତଦନ୍ତ ପ୍ରକ୍ରିୟା ଆରମ୍ଭ କରାଯାଇଥିଲା । ଏପରିକି ଏସପି ନିଜେ ଏହି ଶବ ଚୋରି ରାକେଟର ପର୍ଦ୍ଦାଫାଶ କରିବା ସହ ଅଭିଯୁକ୍ତଙ୍କୁ ତୁରନ୍ତ ଗିରଫ କରାଯିବ ବୋଲି ପ୍ରତିଶ୍ରୁତି ଦେଇଥିଲେ । ହେଲେ ପୋଲିସର ସମସ୍ତ ପ୍ରତିଶ୍ରୁତି ଓ ଅନୁସନ୍ଧାନ ସତ୍ତ୍ୱେ ଅପରାଧୀମାନେ ପୁଣିଥରେ ଏହି କାଣ୍ଡ ଭିଆଇ ପୋଲିସକୁ ସୋଧା ଚ୍ୟାଲେଞ୍ଜ ଦେଇଛନ୍ତି ।