ଆପ କରୁଛି ବିଜେପିର ଗୁଇନ୍ଦାଗିରି
ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ବିଜେପିର ଗୁଇନ୍ଦାଗିରି କରୁଛି ଆମ୍ ଆଦମୀ ପାର୍ଟି ସରକାର। ଦିଲ୍ଲୀରେ ଆମ୍ ଆଦମୀ ପାର୍ଟି ସରକାର ବିଜେପି ଉପରେ ଗୁପ୍ତଚରଭାବେ ଖବର ନେଉଥିବାର ଅଭିଯୋଗ ହୋଇଛି । ଏହି ମାମଲାରେ ଉପ ରାଜ୍ୟପାଳ ବିନୟ ସକସେନା ଉପମୁଖ୍ୟମନ୍ତ୍ରୀ ମନୀଷ ସିସୋଦିଆଙ୍କ ବିରୋଧରେ ଦୁର୍ନୀତି ନିବାରଣ ଅଧିନିୟମ ଆଧାରରେ ମାମଲା ରୁଜୁ କରିବାକୁ ସିବିଆଇକୁ ଅନୁମତି ଦେଇଛନ୍ତି ।
ସିସୋଦିଆଙ୍କ ସମେତ ୬ ଅନ୍ୟ ଅଧିକାରୀଙ୍କ ବିରୋଧରେ ମଧ୍ୟ ମାମଲା ରୁଜୁ ହେବ। ଏହି ୬ ଜଣଙ୍କ ମଧ୍ୟରେ ଜେଣ ଆଇଏଏସ୍ ଅଧିକାରୀ ମଧ୍ୟ ସାମିଲ ଅଛନ୍ତି। ଅଭିଯୋଗ ମୁତାବକ, ଆମ୍ ଆଦମୀ ପାର୍ଟି ସରକାର ୨୦୧୫ରେ କ୍ଷମତାକୁ ଆସିବା ପରେ ଭିଜିଲାନ୍ସ ବିଭାଗ ଅଧୀନରେ ଏକ ଫିଡବ୍ୟାକ୍ ୟୁନିଟ୍ ଗଠନ କରିଥିଲେ ଯାହା ରାଜନୈତିକ ବିରୋଧୀଙ୍କ ଗୁପ୍ତଚର କାର୍ୟ୍ୟରେ ବ୍ୟବହୃତ ହୋଇଥିଲା। ଏଲଜିଙ୍କ କାର୍ୟ୍ୟାଳୟର ଅଧିକାରୀଙ୍କ କହିବାନୁସାରେ, ସିବିଆଇର ପ୍ରାଥମିକ ଅନୁସନ୍ଧାନରେ ଏହା ସାମ୍ନାକୁ ଆସିଛି ଯେ ନେତାଙ୍କ ଉପରେ ଗୁଇନ୍ଦାଗିରି କରିବା ପାଇଁ ଏହି ଫିଡବ୍ୟାକ୍ ୟୁନିଟ୍ ବ୍ୟବହାର କରାଯାଇଥିଲା।