ରାୟଗଡା,(ବଡ଼ ଖବର ବ୍ୟୁରୋ):
କୋରାପୁଟ ଜିଲା ଲକ୍ଷ୍ମୀପୁରରୁ ବାହାରି କଟକ ଅଭିମୁଖେ ଯାଉଥିବା ଏକ ଘରୋଇ ବସ ଫରଚୁନ ଦୁର୍ଘଟଣାର ସମ୍ମୁଖୀନ ହୋଇଛି । ବସଟି ରାସ୍ତାପାଶ୍ୱକୁ ଓଲଟି ପଡିଥିବା ବେଳେ ଦୁର୍ଘଟଣାରେ ଡ୍ରାଇଭର ସମେତ ୨ଜଣଙ୍କ ମୃତ୍ୟୁ ଘଟିଛି । ରାତିର ଅନ୍ଧକାର ଭିତରେ ବସତଳେ ଚାପିହୋଇ ରହିଥିବା ସମସ୍ତ ଆହତ ଯାତ୍ରୀଙ୍କୁ ଉଦ୍ଧାର କରାଯାଇଛି ।
ସୋମବାର ସନ୍ଧ୍ୟାରେ ଲକ୍ଷ୍ମୀପୁରରୁ କଟକ ଅଭିମୂଖେ ବସଟି ଛାଡିଥିଲା । ରାୟଗଡା ବସଷ୍ଟାଣ୍ଡରୁ ପ୍ରାୟ ୩୨ଜଣ ଯାତ୍ରୀଙ୍କୁ ନେଇ ବିଷମକଟକ ରାସ୍ତାଦେଇ ବସଟି କଟକ ଯାଉଥିଲା। ବିଷମକଟକ ଏବଂ କୁମାରଧାମୁଣିର ମଧ୍ୟଭାଗ ହାଜାରଡାଙ୍ଗ ନିକଟରେ ଏକ ବୁଲାଣିରେ ବସଟି ଭାରସାମ୍ୟ ହରାଇ ରାସ୍ତାପାଶ୍ୱରେ ପ୍ରାୟ ଥରଥର କରି ୩ଥର ଓଲଟି ସ୍ଥିର ହୋଇଥିଲା । ସେତେବେଳକୁ ବସଟିର ଅବସ୍ଥା ଖଣ୍ଡଖଣ୍ଡ ହୋଇଯାଇଥିବା ବେଳ ସମସ୍ତ ଯାତ୍ରୀମାନେ ବସରେ ଫସିହୋଇ ରହିଥିଲେ । ସ୍ଥାନୀୟ ଲୋକେ ଖବର ପାଇ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିବା ବେଳେ ପରେ ବିଷମକଟକ ଦମକଳ ବାହିନୀ ଏବଂ ପୁଲିସ ପହଞ୍ଚି ବସତଳେ ଚାପିହୋଇ ରହିଥିବା ଲୋକଙ୍କୁ ଉଦ୍ଧାର କରିଥିଲେ । ଜେସିବି ଏବଂ ହାଇଡ୍ରା ଲଗାଇ ବସକୁ ଉଠାଇବା ପରେ ଭିତରେ ଏବଂ ତଳେ ପଡିଥିବା ଲୋକଙ୍କୁ ବାହାର କରିବାରେ ସକ୍ଷମ ହୋଇଥିଲେ । ତେବେ ବସ ଡ୍ରାଇଭର ଏବଂ ଅନ୍ୟ ଜଣେ ଯାତ୍ରୀ ବସତଳେ ଚାପିହୋଇ ମୃତ୍ୟୁବରଣ କରିଥିଲେ । ମୃତକଙ୍କ ପରିଚୟ ମିଳିପାରିନଥିବା ବେଳେ ଡ୍ରାଇଭର ଜଣକ ନୟାଗଡ ଜିଲା କଳାପଥର ଗ୍ରାମର ବୋଲି ଜଣାପଡିଛି । ଆହତ ସମସ୍ତଙ୍କୁ ବିଷମକଟକ ସ୍ଥିତ ଖ୍ରୀଷ୍ଟିୟାନ ହସପିଟାଲ ଏବଂ ଗୋଷ୍ଟି ସ୍ୱାସ୍ଥ୍ୟକେନ୍ଦ୍ରରେ ଚିକିତ୍ସିତ କରାଯାଇଛି। ଜଣଙ୍କର ଅବସ୍ଥା ଗୁରୁତର ହୋଇପଡିଥିବା ବେଳେ ବିଳମ୍ବିତ ରାତିରେ ତାଙ୍କୁ ବିଶାଖପାଟଣା ସ୍ଥାନାନ୍ତର କରାଯାଇଥିବା ଜିଲାପାଳ ପ୍ରମୋଦ କୁମାର ବେହେରା ପ୍ରକାଶ କରିଛନ୍ତି।
