ଭାରତ ଫେରୁଛନ୍ତି ଅଦାର ପୁନାୱାଲା
ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ସେରମ୍ ଇନଷ୍ଟିଚ୍ୟୁଟ୍ ଅଫ୍ ଇଣ୍ଡିଆର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (ସିଇଓ) ଅଦାର ପୁନାୱାଲା ଆଜି ଲଣ୍ଡନରୁ ଭାରତ ଫେରୁଛନ୍ତି । ଭାରତରେ କରୋନାର ଦ୍ୱିତୀୟ ଲହର ଉଦବେଗଜନକ ରହିଛି । ଲୋକଙ୍କ ଚାହିଦା ମେଣ୍ଟାଇବା ପାଇଁ ଆଣ୍ଟି-କୋଭିଡ ଟିକା ଅଧିକ ପ୍ରସ୍ତୁତ କରିବାକୁ ତାଙ୍କ ଉପରେ ଚାପ ପଡୁଛି । ଜୀବନ ପ୍ରତି ଭୟ ଥିବାରୁ ସେ ସପରିବାର ଲଣ୍ଡନ ପଳାଇଥିଲେ ।
କେନ୍ଦ୍ର ସରକାର ସୁରକ୍ଷା ଯୋଗାଇଦେବେ ବୋଲି ପ୍ରତିଶ୍ରୁତି ଦେବା ପରେ ଅଦାର ଭାରତ ଫେରୁଛନ୍ତି । ତାଙ୍କ ସୁରକ୍ଷାରେ ନିୟୋଜିତ ହେବେ ସେଣ୍ଟ୍ରାଲ ରିଜର୍ଭ ପୋଲିସ ଫୋର୍ସର ୫ କମାଣ୍ଡୋ । ତେଣେ ମହାରାଷ୍ଟ୍ର କଂଗ୍ରେସ ସଭାପତି ନାନା ପଟେଲ କହିଛନ୍ତି ଆଦାର ଓ ତାଙ୍କ ପରିବାରର ସୁରକ୍ଷା ଦାୟିତ୍ୱ କଂଗ୍ରେସ ନେବ । ଦେଶର ହିତପାଇଁ ସେ ଟିକା ପ୍ରସ୍ତୁତ କରୁଛନ୍ତି । ତାଙ୍କୁ କିଏ ଧମକ ଦେଉଛି, ସେହି ନେତାଙ୍କ ନାମ ଅଦାର ପ୍ରକାଶ କରନ୍ତୁ ବୋଲି ନାନା ପଟେଲ କହିଛନ୍ତି ।