ନୂଆଦିଲ୍ଲୀ (ବଡ଼ ଖବର ବ୍ୟୁରୋ): କଲମ୍ବିଆର ଆମାଜନ ଜଙ୍ଗଲରେ ବିମାନ ଦୁର୍ଘଟଣାରେ ଖସି ପଡ଼ିଥିଲେ ୪ ଜଣ ଶିଶୁ। ଦୀର୍ଘ ୪୦ ଦିନ ପରେ ସେମାନଙ୍କୁ ଏହି ଜଙ୍ଗଲରୁ ଜୀବିତ ଉଦ୍ଧାର କରାଯାଇଛି। ରାଷ୍ଟ୍ରପତି ଗୁଷ୍ଟାଭୋ ପେଟ୍ରୋ ଶୁକ୍ରବାର ଦିନ ଏନେଇ ଘୋଷଣା କରିଛନ୍ତି । ଉଦ୍ଧାର ହୋଇଥିବା ଶିଶୁଙ୍କ ବୟସ ୪, ୯, ୧୧ ଓ ୧୩ ବର୍ଷ ବୋଲି ଜଣାପଡିଛି । ହ୍ରିଂସ ଜୀବଜନ୍ତୁଙ୍କ ଗହଣରେ, ବିନା ଖାଦ୍ୟପାଣିରେ ୪୦ଦିନ ଧରି କିଭଳି ଏମାନେ ଜୀବିତ ରହିଲେ ଆଶ୍ଚର୍ଯ୍ୟ କରିଦେଇଛି । ମେ’ ୧ ରୁ ସେମାନେ ଜଙ୍ଗଲରେ ଘୂରି ବୁଲୁଥିଲେ। ସେମାନେ ଯାତ୍ରା କରୁଥିବା ବିମାନଟି ଦୁର୍ଘଟଣାଗ୍ରସ୍ତ ହୋଇ ଖସି ପଡ଼ିଥିଲା।
ଉକ୍ତ ୪ ଜଣ ଶିଶୁଙ୍କ ସହ ଥିବା ସେମାନଙ୍କ ମା’ ଏବଂ ଅନ୍ୟ ବୟସ୍କ ବ୍ୟକ୍ତି ଓ ପାଇଲଟଙ୍କର ଦୁର୍ଘଟଣାରେ ମୃତ୍ୟୁ ହୋଇଯାଇଥିଲା। ୪ ଜଣ ଶିଶୁଙ୍କୁ ଖୋଜିବାପାଇଁ ବଡ଼ ଧରଣର ସର୍ଚ୍ଚ ଅପରେସନ୍ ଆରମ୍ଭ ହୋଇଥିଲା କିନ୍ତୁ ପାଦଚିହ୍ନ, ଡାଇପର, ଅଧା ଖିଆ ଫଳ ଉଦ୍ଧାରକାରୀ ଦଳଙ୍କୁ ସେମାନଙ୍କ ନିକଟରେ ପହଞ୍ଚାଇଥିଲା। ସ୍ଥାନୀୟ ଆଦିବାସୀଙ୍କ ସହାୟତାରେ ସେନା ପକ୍ଷରୁ ସର୍ଚ୍ଚ ଅପରେସନ କରାଯାଇଥିଲା । ଦୁର୍ଘଟଣାସ୍ଥଳରୁ ୫କିଲୋମିଟ ପର୍ଯ୍ୟନ୍ତ ସର୍ଚ୍ଚ ଅପରେସନ କରିଥିଲା ସେନା ।
