ଟ୍ରେନରୁ ଲଂଚ ହେଲା ଅଗ୍ନି ମିଶାଇଲ୍
ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ଭାରତକୁ ଐତିହାସିକ ସଫଳତା । ଥରିବ ପାକିସ୍ତାନ । ଏଣିକି ଚଳନ୍ତା ଟ୍ରେନରୁ ଶତ୍ରୁ ଉପରେ କରାଯିବ ଆକ୍ରମଣ । ଯାହାର ସଫଳ ପରୀକ୍ଷଣ କରିଛି ଭାରତ । ଅଗ୍ନି ପ୍ରାଇମ କ୍ଷେପଣାସ୍ତ୍ରରେ ଏହାର ସଫଳ କରାଯାଇଛି । ପ୍ରତିରକ୍ଷା ଗବେଷଣା ଏବଂ ବିକାଶ ସଂଗଠନ ଡିଅରଡିଓ ମଧ୍ୟମ ଦୂରଗାମୀ ଅଗ୍ନି-ପ୍ରାଇମ ମିଶାଇଲ୍ର ସଫଳ ପରୀକ୍ଷଣ କରିଛି। ଏହି ପରୀକ୍ଷଣ ରେଳ-ଆଧାରିତ ମୋବାଇଲ୍ ଲଞ୍ଚର୍ ସିଷ୍ଟମରୁ କରାଯାଇଛି। ଅଗ୍ନି-ପ୍ରାଇମ୍ ହେଉଛି ଏକ ମଧ୍ୟମ ଦୂରଗାମୀ କ୍ଷେପଣାସ୍ତ୍ର ଯାହାର ରେଞ୍ଜ ୨୦୦୦ କିଲୋମିଟର ପର୍ୟ୍ୟନ୍ତ ରହିଛି। ଡିଆରଡିଓ ଏହାକୁ ଓଡ଼ିଶାର ଚାନ୍ଦିପୁରରୁ ଏକ ରେଳ ମୋବାଇଲ୍ ଲଞ୍ଚରରୁ ଲଞ୍ଚ କରିଛି।
ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଏହି ସଫଳତା ପାଇଁ ଡିଆରଡିଓକୁ ଅଭିନନ୍ଦନ ଜଣାଇଛନ୍ତି। ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଏକ୍ସରେ ଏକ ପୋଷ୍ଟ ସେୟାର କରି କହିଛନ୍ତି ଯେ, ଭାରତ ମଧ୍ୟମ ଦୂରଗାମୀ ଅଗ୍ନି-ପ୍ରାଇମ୍ କ୍ଷେପଣାସ୍ତ୍ରକୁ ରେଳ-ଆଧାରିତ ମୋବାଇଲ୍ ଲଞ୍ଚର୍ ସିଷ୍ଟମରୁ ସଫଳତାର ସହ ପରୀକ୍ଷଣ କରିଛି। ଏହି ପରବର୍ତ୍ତୀ ପିଢ଼ିର କ୍ଷେପଣାସ୍ତ୍ର ୨୦୦୦ କିଲୋମିଟର ପର୍ୟ୍ୟନ୍ତ ଷ୍ଟ୍ରାଇକ୍ ରେଞ୍ଜ ପାଇଁ ଡିଜାଇନ୍ କରାଯାଇଛି ଏବଂ ଏଥିରେ ଅନେକ ଉନ୍ନତ ବୈଶିଷ୍ଟ୍ୟ ରହିଛି। ଏହି କ୍ଷେପଣାସ୍ତ୍ରଟି ଏକ ବଡ଼, ଦୃଢ଼ କ୍ୟାନିଷ୍ଟରରେ ରଖାଯାଇଛି। ଏହା ପାଣିପାଗ ପ୍ରତି ମଧ୍ୟ ପ୍ରତିରୋଧୀ। ଏହା ପ୍ୟାକ୍ ହୋଇ ରହିଥିବାରୁ ଏହାକୁ କମ୍ ଥର ରକ୍ଷଣାବେକ୍ଷଣ ଆବଶ୍ୟକ ହୁଏ।
ସେନା ପାଇଁ ଏହି ନୂତନ ପ୍ରଯୁକ୍ତିର ସୁବିଧା ହେଉଛି ଯେ,ଏହି କ୍ଷେପଣାସ୍ତ୍ରକୁ ରେଳ ନେଟୱାର୍କ ମାଧ୍ୟମରେ ଦେଶର ଯେକୌଣସି ସ୍ଥାନକୁ ପରିବହନ କରାଯାଇପାରିବ ଓ ବହୁତ କମ ସମୟ ମଧ୍ୟରେ ନିକ୍ଷେପ କରାଯାଇପାରିବ। ଏହା ଶତ୍ରୁକୁ ଅଜଣା ରଖିପାରିବ ଏବଂ ଭାରତ ତୁରନ୍ତ ଜବାବ ଦେଇପାରିବ। ଏହା ପ୍ରଥମଥର ପାଇଁ ଏକ ସ୍ବତନ୍ତ୍ର ଭାବରେ ଡିଜାଇନ ହୋଇଥିବା ରେଳ-ଭିତ୍ତିକ ମୋବାଇଲ ଲଞ୍ଚର୍ରୁ ଏପରି ପରୀକ୍ଷଣ କରାଯାଇଛି। ସେ କହିଛନ୍ତି ଅଗ୍ନି-ପ୍ରାଇମ ମିଶାଇଲ୍ର ସଫଳ ପରୀକ୍ଷଣ ପାଇଁ ଡିଆରଡିଓ, ଷ୍ଟ୍ରାଟେଜିକ ଫୋର୍ସ କମାଣ୍ଡ ଏଏସଏଫସି ଏବଂ ସଶସ୍ତ୍ର ବାହିନୀକୁ ହାର୍ଦ୍ଦିକ ଅଭିନନ୍ଦନ।
ଏହି ସଫଳ ପରୀକ୍ଷଣ ଭାରତକୁ ରେଳ ସିଷ୍ଟମରୁ ମିଶାଇଲ୍ ନିକ୍ଷେପ କରିବାରେ ସକ୍ଷମ କିଛି ବଛା ବଛା ଦେଶ ମଧ୍ୟରେ ସ୍ଥାନିତ କରିଛି। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ଏହା ରେଳ ନେଟୱାର୍କ ସହିତ ଯାତ୍ରା କରିବାର କ୍ଷମତା ରଖିଛି। ଏହାକୁ ଅତି କମ ସମୟ ମଧ୍ୟରେ ଦେଶର ଯେକୌଣସି ସୀମାକୁ ସହଜରେ ପରିବହନ କରାଯାଇପାରିବ। ଏହା ରାଡାରକୁ ଏଡାଇବାରେ ଅତ୍ୟନ୍ତ ସକ୍ଷମ। ଏହି ମିଶାଇଲ୍ଟି ଅନେକ ଉନ୍ନତ ବୈଶିଷ୍ଟ୍ୟ ସହିତ ସଜ୍ଜିତ। ଏହାର ନାଭିଗେସନ ସିଷ୍ଟମ ଅତ୍ୟନ୍ତ ଉନ୍ନତ, ଯାହା ଏହାକୁ ଶତ୍ରୁ ଲକ୍ଷ୍ୟସ୍ଥଳକୁ ସଠିକ ଭାବରେ ଟାର୍ଗେଟ କରିପାରିବ।