ପୋଲିସକୁ ଅଟକାଇଲେ ଗ୍ରାମବାସୀ
ବଡ଼ମ୍ବା (ବଡ଼ ଖବର ବ୍ୟୁରୋ): ଗିରଫ କରିବାକୁ ଆସିଲେ ପୋଲିସ । ଗିରଫ କରିବା ପୂର୍ବରୁ ପୋଲିସକୁ ଅଟକ ରଖିଲେ ଗ୍ରାମବାସୀ । କଟକ ଜିଲ୍ଲା ବଡ଼ମ୍ବା ବ୍ଲକ ଗୋପାଳପୁର ଗାଁରେ ଦେଖିବାକୁ ମିଳିଛି ଏଭଳି ଦୃଶ୍ୟ ।
ବଡମ୍ବା ଥାନାର ପୋଲିସ ସିଭିଲ ଡ୍ରେସରେ ଗୋପାଳପୁର ଗ୍ରାମର ଯୁବ ସମାଜସେବୀ ସାବୁଲି ବେହେରାକୁ କୌଣସି ମାମଲାରେ ଉଠାଇ ନେବାକୁ ଆସିଥିଲା । ନିଜ ଦୋଷ ସମ୍ପର୍କରେ ପୋଲିସକୁ ପଚାରିଥିଲେ ସାବୁଲି । ଦୋଷ ଜଣାଇବା ପରିବର୍ତ୍ତେ ପୋଲିସ କର୍ମଚାରୀମାନେ ତାଙ୍କୁ ମାଡ଼ ମାରିଥିଲେ । ଯାହାକୁ ନେଇ ତାତି ଯାଇଥିଲେ ଗ୍ରାମବାସୀ । ପୋଲିସ ଭ୍ୟାନକୁ ଅଟକ ରଖିଥିଲେ ଗ୍ରାମବାସୀ । ଘଟଣାସ୍ଥଳରେ ଆଠଗଡ଼ ଏସଡିପିଓ ପହଞ୍ଚି ବୁଝାଇବା ପରେ ଉତ୍ତେଜନା ଥମିଥିଲା। ରାଜନୈତିକ ଉଦେଶ୍ୟ ରଖି ପୋଲିସ ଏଭଳି ଅରାଜକତା ସୃଷ୍ଟି କରୁଛନ୍ତି ବୋଲି ଗ୍ରାମବାସୀ ଅଭିଯୋଗ କରିଛନ୍ତି।